Jimco, Janaayo, 26, 2018 (HOL) - Markab Saanad Milateri u siday AMISOM ayaa
markii u horeysay ku xirtay Dekeda Baraawe ee Gobolka Shabeellaha Hoose.
Xilliga uu Markabka ku soo xiranayay Dekeda Baraawe ayaa waxaa ku sugnaa
Guddoomiyaha Gobolka Shabeellaha Hoose Ibraahim Cali Aadan Najax iyo Saraakiil
ka tirsan AMISOM.
Guddoomiyaha Gobolka Shabeellaha Hoose Ibraahim Najax ayaa sheegay in
markabkan uu saanad iyo sahay u siddo Ciidamada AMISOM iyo Ciidanka xoogga
dalka ee ku sugan Baraawe
“Waxaa Dekadda Baraawe Ku soo Xirtay Markab Sida Saadka Ciidanka Xooga Dalka
Soomaliyed iyo AMISOM, waxaana Suura Geliyay Nabada Iyo Hormarka Ka Jira
Magaalada Baraawe”ayuu yiri Guddoomiyaha Gobolka Shabeellaha Hoose.
Sidoo kale waxaa uu sheegay in dhowaan dayactir ku sameyn doonaan garoonka
diyaaradaha Baraawe, si uu uga qeyb qaadato baahiyaha ka jira Baraawe.
Ciidamada AMISOM ee ku sugan Baraawe ayaa go’doon ku jira, waxaana
sahayda iyo saanada Milateri ee looga qaadi jiray magaalada Muqdisho ay ku
gaareysay Baraawe maalmo, iyadoo wadada loo galayay gaadiidka saanada iyo
sahayda u siday.
C/raxmaan Diini, Hiiraan Online
[email protected]
