Khamiis, Janaayo, 25, 2018 (HOL) - Ra’iisul Wasaaraha Xukuumadda Federaalka
Soomaaliya Xasan Cali Khayre ayaa magaalada Davos ee dalka Switzerland kula
kulmay dhigiisa Ra’iisul Wasaaraha Norway Erna Solberg.
Kulanka labada dhinac oo qaatay daqiiqado badan ayaa waxaa looga hadlay
arrimo badan oo labada dal quseeya oo ay ka mid ahaayeen sii xoojinta xiriirka
labada dal u dhaxeeya iyo sidii Norway u sii kordhin laheyd taageerada ay siiso
Soomaaliya.
Ra’iisul Wasaaraha Xukuumadda Federaalka Soomaaliya Xasan Cali Khayre oo
heysta dhalashada Norway ayaa ka mahadceliyay taageerada ay Norway siiso
Soomaaliya, wuxuuna tilmaamay Norway in ay ka mid tahay dalalka sida aadka ah
horumarka ula jecel Soomaaliya.
“Waxaan kulan la yeeshay ra’iisul wasaaraha Norway Erna Solberg, oo aan ka
wada hadalnay sii xoojinta xirriirka fiican ee labada dal iyo sidii Norway usii
kordhin lahayd taageerada ay siiso Soomaaliya, waxaan rajeynayaa dhammaan
arrimahan in ay hirgalaan” ayuu yiri Khayre.
Ra’iisul Wasaaraha ayaa kulamo la yeeshay qaar ka tirsan madaxda ka qeyb
galeysa shirka Dhaqaalaha Adduunka, waxaana uu kala hadlayay sidii taageero ugu
heli lahaa mashaariicda ay dooneyso inay fuliso Xukuumaddiisa.
Soomaaliya waxaa ay ka mid tahay dalalka yar ee ka tirsan Qaaradda Afrika ee
lagu marti qaaday ka qeybgalka shirka magaalada Davos, waxaana ku matalaya
Ra’iisul Wasaare Khayre iyo wafdi uu hoggaaminayo.
Shirkan ayaa waxaa isugu yimid in ka badan 120 dal oo heysta ka qeybgalka
casuumadda shirkan, iyada oo shirkan diirada lagu saaray kobcinta dhaqaalaha caalamka,waxaana
lagu gorfeeyay sida loo kordhin karo dhaqaalaha Caalamka, loona yareyn karo
dhaqaale xumada.
Dowladda Soomaaliya waxaa ay sheegtay in ay isbeddel ku sameysay hanaanka
Canshuuraha iyo maaliyadda islamarkaana hadda tahay dal dalbanaya in laga
cafiyo deymaha lagu leeyahay.
C/raxmaan Diini, Hiiraan Online
[email protected]