Arbaco, Janaayo, 24, 2018 (HOL) -Dowladda Federaalka Soomaaliya ayaa
sheegtay in ay ka warqabto xaalada iyo nolosha ay ku sugan yihiin caruurtii
19-kii bishan Howlgalkii Ciidanka Ammaanka Dowladda ay ku qaadeen xero tababar
oo Shabaab ay ku lahaayeen degaanka Jiliyaale ee gobolka Shabellaha Dhexe,
halkaasi oo ay ku soo furteen 35 Carruur ah.
War qoraal ah oo ka soo baxay xafiiska Wasaaradda Warfaafinta kuna qornaa
luuqada Ingiriiska ayaa waxaa lagu sheegay Caruurtii ay Dowladda soo furatay in
ay si joogto ah u helayaan difaaca iyo xuquuq buuxda oo ay leeyihiin, iyada oo
dowladdu ay sheegtay in ay bixiso dhammaan adeegyada aasaasiga ah ee Caruurta.
“Ciidamada Ammaanka Qaranka Soomaaliya ayaa badbaadiyay 35 carruur ah oo
lagu afduubay xerada Al-Shabaab ee Shabeellaha Dhexe 19-kii Janaayo 2018,
dowladda federaalka Soomaaliya waxaa ay heshay macluumaad macquul ah oo ku saabsan
xeryaha iyo dhaq dhaqaaqyada soconayay, ciidamada amniga Qaranka sida ugu
dhaqsiyaha badan ayay ku bilaabeen Howlgalkooda, ugu dambeynna way ku
guuleysteen.” ayaa lagu yiri Warka ka soo baxay Wasaradda Warfaafinta.
Sidoo kale warkan ayaa lagu sheegay in dowladda Federaalka ay ka go’an tahay
in ay fuliso hawlgallo Milateri si loo helo nabad, waxayna tilmaamtay in marnaba
aysan ogoleyn in caruurta loo isticmaalo dagaalada.
Dowladda Federaalka oo Al-shabaab ku eedeysay in aysan dan iyo xaajo ka
laheyn caruurta ayaa sheegtay in ay mudnaanta koowaad ay siineyso amniga si
muwaadin kasta uu ugu raaxeysto nabadda iyo xasilloonida, loona
horumariyo Qaranka.
Carruurtaasi qaarkood oo la geeyay xarunta ciidamada AMISOM ee Xalane ayaa
sawirro laga soo qaaday waxaa ay muujinayeen in ay haysato xaalado dhanka
caafimaadka iyo daryeel la’aan ah, waxaana Qoraalka dowladda uu u muuqdaa mid
jawaab u ah warbaahinta oo shalay baahiyay in xaalad aan wanaagsaneyn ay ku
nool yihiin Carruurtan.
Degaanka Jiliyaale oo ka tirsan Gobolka Shabellaha dhexe, Jowharna u jira
30-KM ayaa laga soo furtay Carruurta goob dowladda ay sheegtay Al-shabaab in ay ku
tababarayeen ilmahan si ay u baraan habka dagaalka.
C/raxmaan Diini,
Hiiraan Online
[email protected]