Arbaco, Janaayo, 24, 2018 (HOL) - Dowladda Jarmalka ayaa maanta oo Arbaco ah
ku dhawaaqday balanqaadkeeda ah 32 milyan oo Euro oo ay ugu tala gashay
Soomaaliya, si ay ugu taageerto shaqada kaabayaasha Soomaaliya.
Lacagtan ayaa dowladda Soomaaliya loo soo marsiinayaa Bankiga Adduunka, gaar
ahaan qeybta Jarmalka oo lagu magacaabo Multiple Partner Fund (MPF), taasi oo
gacan ka geysanaysa xoojinta kartida deegaanka iyo kartida hirgelinta si loo
hagaajiyo helitaanka kaabayaasha Aas-asiga ah ee Soomaaliya.
Madaxa Iskaashiga horumarinta Maalgashiyada iyo kaabayaasha dhaqaalaha ee
dalka Jarmalka Marius Rau ayaa sheegay ayaa sidoo kale lacagtan in loogu tala-galay
koritaanka magaalooyinka, horumarinta xaaladaha nololeed ee muwaadiniinta
Soomaalida iyo arrimo kale.
“Bangiga Adduunka ee doorka ka ah Soomaaliya wuxuu ku saabsan yahay in la
shaqeeyo iyo iyada oo loo marayo xukuumadda iyo dhisidda awoodda masuuliyiinta
si ay u xoojiyaan dib-u-habeynta iyo horumarka.” ayuu yiri Marius.
Wasiirka maaliyadda xukuumadda Federaalka Soomaaliya C/raxmaan Ducaalle
Beyle oo arrintan si kooban uga hadlay ayaa sheegay in dowladda Soomaaliya u
mahadcelineyso Jarmalka oo mar kale qaaday talaabo wanaagsan oo horumar u ah
dalka iyo dadka Soomaaliyeed.
Sanduuqa dhaqaalaha ee dowladda Jarmalka (MPF) oo lacagtan loo soo marsiiyay
dowladda Soomaaliya ayaa taageero ka hela Midowga Yurub (EU), Hay’adda
Maraykanka ee Horumarinta Caalamiga ah (USAID), Bangiga Adduunka iyo Sanduuqa nabad-galyada
(SPF).
C/raxmaan Diini, Hiiraan Online
[email protected]