Al-shabaab oo sheegatay in weerar maadaafiic ah ku qaadeen fariisimo AMISOM ay degenaayeen
Arbaco, Janaayo, 24, 2018 (HOL) – Wararka ka imanaya gobolka Shabeellaha
hoose ayaa sheegaya in Al-shabaab Weerar madaafiic ku qaadeen saldhigyo
ciidamada AMISOM ku lahaayeen gobolka.
Weerarkan madaafiicda ayaa saqdii dhexe ee xalay lagu qaaday saldhigyo ciidamada
Midowga Afrika ee AMISOM ay ku leeyihiin deegaanada NO. 60 iyo Golweyn ee ka
tirsan Gobolka Shabeellaha Hoose.
Madaafiicda qaar ayaa lagu soo waramayaa inay gudaha u galeen saldhiga
ciidamada AMISOM, halkaasi oo suuragal ay tahay inuu ka dhashay khasaare.
Al-shabaab ayaa sheegay in weerar madaafiic ah ku qaadeen fariisimo Ciidanka
AMISOM ay leeyihiin, khasaarana ay ku gaarsiiyeen.
Waxaa ay intaa ku darreen in meelaha qaar dagaal kooban uu ku dhexmaray ciidamada
AMISOM iyo Al-shabaab, kaaasi oo labada dhinac ay isku adeegsadeen hubka
nuucyadiisa kala duwan.
Warar madax banaan ayaa sheegaya in Ciidamada AMISOM ay dhankooda rideen madaafiic
culus oo jawaab ay uga dhigayeen kuwii lagu soo tuuray, kuwaasi oo ku dhacay
degaano ka tirsan Gobolka.
Ilaa hadda si dhab ah looma oga khasaaraha dhimashada iyo midka dhaawaca ah
ee ka dhashay madaafiicdaasi lagu weeraray fariisimaha Ciidamada AMISOM ay ku
leeyihiin Gobolka Shabeellaha Hoose.
C/raxmaan Diini, Hiiraan Online
[email protected]