Ra’iisal wasaare Kheyre oo magaalada Davos Switzerland kula kulmay agaasimaha hay’adda Lacagta aduunka
Arbaco, Janaayo, 24, 2018 (HOL) – Ra’iisul Wasaaraha Xukuumadda Federaalka
Soomaaliya Xasan Cali Khayre ayaa 23-kii January magaalada Davos ee dalka
Switzerlannd kulan kula qaatay Agaasimaha Guud ee Hay’adda Lacagta Adduunka
(IMF) Christine Lagarde, kadib markii uu soo dhamaaday shirkii dhaqaalaha
Adduunka.
Labadan masuul ayaa waxa ay ka wada hadleen kaalmada Hay’adda IMF ee
Soomaaliya, gaar ahaan iyada oo loo marayo laba Barnaamij-Korjoogayaal Shaqaale
ah iyo gargaar farsamo oo ballaaran iyo arrimo kale.
Christine Lagarde ayaa sheegtay Deeqaha deynta ee Soomaaliya in ay tahay
mudnaanta IMF iyo dadaal kasta oo loo sameeyo si loo dedejiyo geeddi-socodka
nidaamyada aasaasiga ah.
Sidoo kale waxa ay sheegtay Agaasimaha Hay’adda lacagta Adduunka IMF inuu meel
wanaagsan marayo dhaq dhaqaaqa joogtada ah ee ka socda Soomaaliya, oo ay ka mid
tahay in la gaaro qodobka awooda u siinaya in uu helo deyn bixinta iyadoo la
adeegsanayo dadaal kasta.
Xasan Cali Khayre Ra’iisul Wasaaraha Xukuumadda Federaalka Soomaaliya ayaa
IMF uga mahadceliyay sida wanaagsan ee ay u garab taagan yihiin Soomaaliya,
wuxuuna Khayre rajo ka muujiyay in Soomaaliya laga cafiyo deymaha lagu
leeyahay.
Xaaladaha dhaqaale ee hoos-yimaada Soomaaliya ayaa weli ah mid adag, laakiin
madaxda ayaa dadaal adag ugu jira dib-u-dhiska dalkooda, Soomaaliya ayaa ka mid
ah kuwa ugu badan ee qaata gargaarka farsamada ee IMF.
Ra’iisal wasaaraha ayaa inta uu ku sugan yahay dalka Switzerland waxa uu la
kulmi doonaa Madax badan oo Afrikaan ah kuwaas oo dalkaasi u jooga ka qeyb
galka Shirka Dhaqaalaha Aduunka.
C/raxmaan Diini,
Hiiraan Online
[email protected]