Madaxweyne Farmaajo oo soo afjaray booqashadiisii Puntland iyo Galmudug, Warbixin
Arbaco, Janaayo, 24, 2018 (HOL) – Booqashadan oo qaadatay ku dhawaad bil
ayuu madaxweynuhu ku tagay deegaanno ka tirsan Puntland iyo Galmudug, iyadoo
socdaalkan uu ahaa kii u horeeyay ee taariikhda Madaxweyne Soomaaliyeed ku tago
deegaano iyo magaalooyin dhowr ah, tan iyo burburkii dowladda dhexe.
Madaxweynaha Maxamed Cabdullaahi Farmaajo ayaa safarkiisa ku soo gunaanuday
degmada taariikhiga ah ee Hobyo, halkaasoo maanta duhurkii uu gaaray, isla
markaana ku dhagax dhigay Dekeda Hobyo laga dhisayo iyo wado isku xireysa Hobyo
iyo Caabudwaaq.
Sidoo kale Madaxweynaha ayaa ka hor inta uusan Hobyo tagin waxaa uu saacado
ku sugnaa Cadaado oo uu mar kale dib ugu laabtay, si uu u xaliyo tabashada
beesha Cadaado ka qabtay heshiiskii Ahlusuna iyo Galmudug.
Safarka Madaxweynaha oo bilowday 7-dii bishan ayaa ku bilaabay magaalada
Garowe ee xarunta dowlad goboleedka Puntland, waxaana kaddib uu tagay Qardho,
Boosaaso, Gaalkacyo.
Madaxweynaha ayaa sidoo kale booqday deegaanada dowlad goboleedka Galmudug,
sida Koofurta Gaalkacyo, Cadaado, Dhuusa Mareeb, Guriceel, Caabudwaaq, Xeraale
iyo Hobyo oo socdaalkiisa ku soo afjaray.
Ilo ku dhow dhow Madaxtooyada ayaa sheegaya in socdaalka Madaxweynaha ku
tagay gobolada dalka oo si nabdoon ugu soo dhamaaday laga soo saarayo war
saxaafadeed, guulihii laga gaaray iyo dib u heshiisiintii ka dhalatay.
Madaxweynaha Soomaaliya iyo wafdi uu hoggaaminayo ayaa shalay gelinkii dambe
dib ugu soo laabtay magaalada Muqdisho ee caasimadda Soomaaliya, wuxuuna
safarkiisa la xiriiray Nabadda iyo dib u heshiisiinta.
C/raxmaan Diini,
Hiiraan Online
[email protected]