Talaado,Janaayo 16,2018 (HOL)-
Madaxweynaha Somaliland Muuse Biixi Cabdi ayaa maanta safarkii labaad ku tagay
dalka Itoobiya ka dib markii uu marti qaad ka helay Ra’isal wasaaraha Itoobiya Hailemariam Desalegne.
Madaxweyne Muuse Biixi ayaan warbaahinta la hadal,isla markaana aan
sheegin ujeedadda safarkiisa uu ku tagayo Itoobiya, haseyeeshee war-saxaafadeed
ka soo baxay xafiiska madaxtooyadda Somaliland ayaa lagu sheegay inuu safarkaasi
yahay mid shaqo oo maalmo kooban qaadan
doonta’
“Madaxweynaha Somaliland, Mudane Muuse Biixi Cabdi iyo wefti balaadhan
oo uu hoggaaminayo, ayaa maanta oo ay taariikhdu tahay 16/01/2018 safar shaqo
oo qaadan doona maalmo kooban ugu ambo-baxay dalka Itoobiya.”ayaa lagu yidhi
qoraalkaasi.
Waxaana intaas lagu daray “Safarka madaxweynaha iyo weftigiisa, ayaa
daba socda marti-qaad rasmi ah oo uu usoo diray ra’isal wasaaraha dalka
Itoobiya Hailemariam Desalegne, waxaana sida qorshuhu yahay uu madaxweynuhu la
kulmi doonaa ra’isal wasaaraha Dalkaasi, iyada oo kulankaasna diiradda lagu
saari doono xidhiidhka qotada dheer ee ka dhexeeya labada dal.”
Madaxweynaha waxa safarkiisa ku
weheliya:
1. Wasiirka Wasaaradda Arrimaha Gudaha Somaliland, Mudane Maxamed
Kaahin Axmed
2. Wasiirka Wasaaradda Ganacsiga, Wershedaha iyo Dalxiiska Somaliland,
Mudane Maxamuud Xasan Sacad
3. Wasiirka Wasaaradda Waxbarashada iyo Sayniska Somaliland, Prof.
Yaasiin Xaaji Maxamuud xiir (Faratoon)
4. Wasiirka Wasaaradda Arrimaha Dibeda Somaliland, Dr Sacad Cali
Shiire oo weftiga kaga Biiri doona Dalka Itoobiya.
5. Taliyaha Ciidanka Qaranka Somaliland, Sareeye Gaas, Nuux Ismaaciil
Taani.
Dhinaca kale, Madaxweyne Muuse Biixi ayaa gabi ahaanba joojiyey dadkii
faraha badnaa ee madaxweyneyaasha sii dhoweyn jiray iyo ciidamadii Miisiga tuma
ee salaan sharafta bixin jiray, waxaanu ku soo koobay tobaneeya askar oo salaam
bixisa.
Sidoo kale waxa uu joojiyey jidadkii loo xidhi jirey madaxweynaha
marka uu baxaya, iyadoo aan cidiba dareemin ayuu xafiiskiisa ka baxa soona gala,
taas oo dadku ku amaaneen wax ka bedelka qaabkii mdaxweynuhu loo soo dhoweyn
jiray oo lacag bdani ku bixi jirtay markasta oo uu xafiiska ka baxo.
Barkhad-ladiif M. Cumar,
Hiiraan Online
[email protected]
Hargeysa, Somaliland.
