Saraakiisha ciidamada xoogga dalka oo faah faahin ka bixiyay dagaallada gobolka Shabeellaha Dhexe
Talaado, Janaayo, 16, 2018 (HOL) - Taliyaha Qeybta 27-aad ee Ciidanka Xoogga
dalka Soomaaliyeed General Maxamuud Maxamed Koronto ayaa faah faahin ka bixiyay
howlgallo ay ciidamada ka fuliyeen inta u dhexeysa Jowhar iyo Balcad.
Taliyaha ayaa sheegay in maalmahan ay in Al-shabaab carqalad ku hayeen
gadiidka isticmaala sida uu hadalka u dhigay Waddada isku xirta Jowhar iyo
Balcad, balse howlgallo ay ciidamada halkasi ka fuliyeen khasaare lagu gaarsiiyay
Al-Shabaab, islamarkaana ciidan xoog leh la dhigay Waddadaas.
General Maxamuud Maxamed Koronto ayaa beeniyay warar sheegayay in Al-shabaab
qabsadeen deegaanno u dhaxeeya Jowhar iyo Muqdisho, waxaana uu intaa ku
daray in ciidamada ay markasta diyaar u yihiin inay shacabka ka dulqaadaan sida uu hadalka u yiri
cadowga.
Ciidamada Xoogga dalka ayaa shalay
qaaday guluf ay ku doonayan in ay isugu furaan Waddada xiriirisa degmooyinka Balcad iyo Jowhar ee
Gobolka Shabeellaha Dhexe oo fariismo ay ka sameysteen Al-shabaab.
Ciidamada Weerarka qaaday oo uu
horkacayo madaxweyne ku-xigeenka Hirshabeelle, Cali C/laahi Xuseen (Cali
Guudlaawe), ayaa la wareegay deegaanka Ceelka Geelow, waxaana la sheegay in
xoogagga Al-shabaab halkaa isaga baxeen.
C/raxmaan Diini,
Hiiraan Online
[email protected]
