Cabdiwali Gaas : Weerarka Soomaaliland wuxuu garab iyo gaashaan u yahay Argagixisada
Arbaco, Janaayo, 10, 2018 (HOL) - Madaxweynaha maamulka Puntland C/wali
Maxamed Cali Gaas ayaa ka hadlay xiisada u dhaxeysa Maamulka Puntland iyo
Somaliland, taasi oo dhawaan soo xoogeysatay, kaddib markii ciidamo ka kala
tirsan labada maamul ay ku dagaalamaneen degaanka Tukaraq.
Gaas ayaa sheegay 8-dii bishan ciidamo laga soo abaabulay sida uu hadalka u
dhigay magaalada Hargeysa duulaan ku soo qaadeen degaanka Tukaraq oo ka tirsan
Gobolka Sool, wuxuuna sheegay dagaalka inuu ku soo aaday xilli booqasho uu
Puntland ku joogo Madaxweynaha Soomaaliya.
Cabdiwali Gaas ayaa sheegay in
Puntland iyo shacabkeeda ay ku filan yihiin difaaca dhulkooda, wuxuuna shacabka
ku sugan gudaha iyo dibadda ee Puntland ugu baaqay in ay u diyaar garoobaan
difaaca dhulkooda.
Sidoo kale Madaxweynaha Puntland ayaa sheegay duulaanka Somaliland in uu
garab iyo gaashaan u yahay Argagixisada, isaga oo sheegay in Puntland ay
culeyska saartay hormarka iyo dib u dhiska dalka.
Madaxweyne Gaas ayaa dowladda federaalka, Beesha Caalamka iyo Ummadda
Soomaaliyeed ogeysiiyay in maamulka Somaliland uu mas’uul ka noqon doono
cawaaqib xumada ka dhalata xiisada Tukaraq.
C/raxmaan Diini, Hiiraan Online
[email protected]