Jimco, Feberaayo, 09, 2018 (HOL) – Warbaahinta dowladda Kenya ayaa baahisay
in Al-Shabaab ay weerar ku qaadeen degaanka Katuula oo ka mid ah degaanada
dalka Kenya ee ku yaalla gobolka Waqooyi Bari.
Sarkaal ka tirsan ciidamada Kenya oo lagu magacaabo Stephen Ngetich ayaa
warbaahimnta u sheegay inay iska caabiyeen weerar ay sideedii fiidnimo
waqtiga dalka Kenya ku soo qaadeen dagaalyahano ka tirsan Al-Shabaab.
Waxaa uu sheegay dagaal socday Muddo ku dhow hal saac in uu dhexmaray
ciidamada dowladda Kenya iyo sidoo kale Xoogagga weerarka soo qaaday.
Al-Shabaab ayaa la sheegay in ay dhowr jiho ka weerareen degaankaasi oo ka
mid ah degaanada hoos yimaada degmada Wajeer.
Ilaa iyo hadda lama ogga khasaaraha ka dhashay Weerarkaasi, waxaana
saraakiisha ciidamada Kenya ay sheegayaan in ay waddaan baaritaano.
Al-Shabaab ayaa waxa ay ku dhawaaqdeen dagaal ka dhan ah dowladda Kenya
Sanadkii 2011-kii Markii ciidamada dowladda Kenya ay gudaha u soo galeen
Soomaaliya.
Labadii sano ee la soo dhaafay, Al-Shabaab waxay diiradda saareen weerarrada
gobollada Kenya ee ku yaalla xuduudda u dhaxeysa Soomaaliya iyo
Kenya.
C/raxmaan Diini, Hiiraan Online
[email protected]
