Khamiis, Feberaayo, 08, 2018 (HOL) -Ururka Al-Qaacidda ayaa lagu waramayaa
in awood buuxda ay ku leeyihiin meelaha qaar caalamka, waxaana la sheegay in ay
ka xoog badan yihiin Ururka Daacish, sida lagu sheegay warbixin qoraal ah oo ay
saareen khubaro ka tirsan Hay’adda Qaramada Midoobay.
Waxa ay sheegtay Qaramada Midoobay in ururka Al-Qaacidda uu aad ugu awood
badan yahay kooxda Daacish marka loo eego dalalka Soomaaliya iyo Yemen.
Waxaa kaloo warbixinta lagu sheegay in Al-Qaacidda ay awood ka badan midda
kooxda Daacish ku leedahay Galbeedka Afrika iyo Koonfurta Aasiya, waxaanala la
aaminsan yahay in Ururada xiriirka la leh Al-Qaacidda ay ka badan yihiin
Daacish.
Sidoo kale waxaa la sheegay in Ururka Al-Qaacidda uu halis ku yahay wadamo
badan, oo magacyadooda aanay Qaramada Midoobay shaacin, kuwaasi oo ku yaalla
Caalamka.
Warbixinta Qaramada Midoobay oo aheyd mid dheer ayaa sidoo kale lagu sheegay
in Al-Qaacidda ay qorsheyneyso weeraro culus oo ay dalalka caalamka ka fuliso,
si awoodeeda urureed ay u muujiso.
C/raxmaan Diini,
Hiiraan Online
[email protected]
