Khamiis, Feberaayo, 08. 2018 (HO) - Iyadoo la filayo in
ay dhacaan munaasabado la xiriira 8-da Febraayo oo ah markii la doortay Madaxweyne
Farmaajo, ayaa qeybo ka mid ah jidadka Muqdisho lagu arkayaa ciidamo aad u
hubeysan oo Amniga sugaya.
Jidadka ciidamadu xireen ayaa waxaa ka mid ah Isgoysyada
Howlwadaag, Sheekh Cali Suufi, Tarbuunka, Taleex, iyo goobo ka mid ah wadada
Maka Al-Mukarama oo ciidamada ay gaadiidka u diidayaan.
Ciidamo hubeysan oo wata Gaadiidka dagaalka ayaa goor sii
horeysay oo xalay aheyd waxaa la dhigay wadooyinka Muqdisho, ciidamada ayaa
gaadiidka u diidaya in wadada Maka Al-mukarama ka soo galaan dhanka jid
cadayaasha.
Shacabka Soomaaliyeed qaarkood ee u shaqa taga magaalada ayaa
saakay waxa ay isticmaalayaan lugtooda, iyada gaadiidka dadweynaha iyaguna ay marayaan
wadooyin ciriiri ah.
Madaxweynaha Soomaaliya Maxamed C/llaahi Maxamed (Farmaajo)
ayaa markii xilign loo doortay waxyaabihii uu balanqaaday waxaa ka mid ahaa in aysan jirin in shacabka lagu cadaadiyo xirnaashiyaha jidadka, laakiin waxaa muuqata in balanqaadkiisi hergalin, madaama inta badan dadweynaha loo diido in ay isticmaalaan jidadka caasimada marka ay jiraan munaasabadaha waaweyn iyo shirarka heer Qaran.
C/raxmaan Diini, Hiiraan Online
[email protected]
