Kheyre oo shir guddoomiyay kulanka Amniga Qaranka oo maalintii labaad ka socda Muqdisho
Arbaco, Feberaayo, 07, 2018 (HOL) –Kulankan oo ay ku dhan
yihiin madaxda dowlad gobolleedyada dalka ayaa waxaa maanta shir guddoomiyay ra’iisal
wasaaraha xukuumada Soomaaliya Xassan Cali Kheyre.
Inkastoo marka dhinac laga eego shirka lagu magacaabay mid
looga hadlayo Amniga Qaranka, haddana meesha kama marna in madaxdu isla eegto
qodobo kale oo waaweyn oo quseynaya danaha Qaranka, gaar arrimaha Dastuurka oo
ah qodobo muhiim u ah dhamaanba dhinacyada miiska wada fadhiya.
Arrimaha Amniga marka laga hadlayo shirka waxaa muhiimad
gaar ah uu siin doonaa qodobka isku
dhafka ciidammada, iyada oo wakiilka Qaramada Midoobay ee Soomaaliya Mr Micheal
Keating uu shirka golaha ammaanka ka sheegay in dowlad goboleedka Puntland ay
ciidammada xoogga dalka ay ku biirisay kumanmaan askar ah, islamarkaasna hawsha
isku dhafka ay si wanaagsan u socoto.
Siyaasiyiinta sida weyn dhaliilsan dowladda ayaa sheegay
in shirkan uu ku soo beegmay iyadoo dowladdu ay ku guul-dareysatay in ay soo
magacaawdo taliyaha nabad-sugida, maadaama wali aan la buuxin muddo billooyin
ah xilkaas.
Galinka dambe ee maanta ayaa shirka lasoo gunaanadi
doonaa, waxaana laga soo saari doonaa war saxaafadeed.
C/raxmaan Diini, Hiiraan Online
[email protected]
