Boqolaal dhalinyaro u badan oo lagu qabqatay howlgal xalay laga sameeyay Muqdisho
Arbaco, Feberaayo, 07, 2018 (HOL) – Ciidmaada
Amaanka dowladda Soomaaliya ayaa xalay howlgal gaar ah ka fuliyay inta badan xaafaddaha ay ka kooban tahay degmada Hodan ee gobolka
Banaadir.
Howlgalkan oo ay si gaar u fuliyeen Ciidamada Nabad Sugidda iyo Booliska
ayaa waxaa lagu soo qab qabtay ku dhowaad 400 qof, kuwaasi oo
dhammaantood ahaa rag, una badnaa dhalinyaro.
Dadka la soo qabqabtay ayaa intooda badan laga soo kaxeeyay guryahooda, waxaana dhamaantood leysugu geeyay
Barxad ku taalla gudaha degmada, iyada
oo qaarkood la weydiinayay in ay wataan aqoonsiyo iyo in xaafada ay degaan ku yihiin.
Ciidamada ayaa sii daayay dadkii ay ku soo qabteen Howlgalka, marka laga
reebo shaqsiyaad dhowr ah oo loo kaxeeyay xarumaha baarista, si su’aalo kale oo
dheeraad ah loo weydiiyo.
Guddoomiye ku xigeenka dhinaca amniga iyo siyaadda Gobolka Banaadir Maxamed
C/laahi Maxamed (Tuulax) oo la hadlay warbaahinta ayaa sheegay ujeedka
Howlgalka in uu ahaa sidii loo xaqiijin lahaa sugidda amniga.
Howlgaladan ayaa imanaya xili magaalada Muqdisho uu ka soconayo shirka
Amaanka Qaranka oo ay ka wada qeyb-qaadanayaan madaxda federaalka iyo kuwa
maamul gobolleedyada dalka.
C/raxmaan Diini, Hiiraan Online
[email protected]
