Isniin, Feberaayo, 05, 2018 (HOL)- Guddoomiyaha
Gobolka Benaadir ahna duqa magaalada Muqdisho Mudane Cabdiraxmaan Cumar Cismaan
(Eng. Yarisow) ayaa amray in la joojiyo dhismaha
ka socda dhulka ka soo horjeeda Dekedda magaalada Muqdisho ee degmada
Xamar-Jabab, kadib markii uu warbixin ka dhageystay waaxda dhul bixinta ee
gobolka Benaadir.
Guddoomiyaha ayaa ku war-galiyay hay’adaha
ay khusayso joojinta hawlaha dhismaha, isagoo tilmaamay in aan loo dulqaadan
karin in dhismayaal sharci darro ah laga sameeyo dhulalka danta guud.
Duqa Muqdisho ayaa faray maamulka degmada Xamar jajab in ay gacanta ku
hayaan dhulkan uu dhismiisu socday waxana hay’adaha ammaanka iyagana lagu
wargeliyey in ay tallaabo ka qaadaan cid walba oo isku dayda dhismaha dhulkan.
“Cid walba oo isku dayda in dhulka danta guud ay dhismeyaal sharci darro ah
ka sameyso tallaabo ayaan ka qaadi doonaa, joojinta dhismaha ka socda dhulka
danta guud ee ka soo horjeeda dekedda magaalada Muqdisho waa tallaabo aan uga
golleenahay in dib loogu soo celiyo gacanta dawladda dhulalka danta ee ka
maqan”.Ayuu yiri Guddoomiye Yarisow.
Guddoomiyaha Gobolka Benaadir ahna duqa Muqdisho Mudane Cabdiraxmaan Cumar
Cusmaan (Eng. Yarisow) ayaa horey u joojiyay dhisme ka socday dhulka danta guud
ee Biyaaso Liibaro oo ku yaala Isgoyska Ceelgaabta, waxana ay tallaabadani qeyb
ka tahay qorshe ballaaran oo maamulka ku doonayo in dib loogu soo celiyo
dhulalka danta guud ee sida sharci darrada ah loo dhisanayo.
C/raxmaan Diini, Hiiraan Online
[email protected]