Arbaco, Feberaayo, 14, 2018 (HOL) - Guddoomiyaha Gobolka Banaadir ahna Duqa
magaalada Muqdisho C/raxmaan Cumar Cusmaan (Eng. Yariisoow) ayaa go’aanno adag
ka soo saaray isqab qabsiga dhulalka ee ka jira magaalada Muqdisho.
Wuxuu sheegay in mamaulkiisa uusan aqbali doonin in xoog lagu kala heysto
dhulalka magaalada Muqdisho, sidoo kalena awood aanan loo sheegan doonin dadka danta
yar ee ku nool Muqdisho.
Sidoo kale wuxuu sheegay muddada kooban ee uu joogo xafiiska gobolka in uu il
gaar ah ku fiirin doono arrimahan, wuxuuna tilmaamay in dhulalka danta guud
aanan loo adeegsan doonin dan gaar ah.
“Waad la socotaan arrimaha dhulalka oo dhibaatooyin badan ay ka jireen, oo
dhulal dan guud ahaa aan talaabo ka qaadnay, welina aan ku raadjoogno inta
dhiman, waxaanan aqbali doonin in qof Bani’aadam ah lagu xad gudbo, ma aqbali
karno in la qaato dhul dan guud ah,” ayuu yiri Duqa Muqdisho.
Guddoomiyaha ayaa hadalkan ka sheegay kulan maanta lagu soo dhaweynayay maamulka
cusub ee gobolka oo Muqdisho ka dhacay,
kaasi oo ay ka qeyb galeen wasiiro iyo xildhibaanno Dowladda Federaalka ka
tirsan.
30-kii January 2018 guddoomiyaha gobolka Benaadir ayaa warqad
uu soo saaray si rasmi ah ugu joojiyey dhismaha ka socday dhulka danta guud ee
Biyaaso Liibaro ee ku yaalla aagga Ceel Gaabta ee degmada Xamar jajab.
Waxaa kaloo jirtay in Duqa magaalada Muqdisho uu warqad rasmi ah ku joojiyey
5-tii February 2018 dhismaha ka socday dhulka ka soo horjeeda Dekedda magaalada
Muqdisho ee degmada Xamar-Jabab, kadib markii uu warbixin ka dhageystay waaxda
dhul bixinta ee gobolka Benaadir.
C/raxmaan Diini, Hiiraan Online
[email protected]
