Axad, December, 09, 2018 (HOL)-Madaxweyne Muuse Biixi ayaa maanta ayaa Xadhigga ka jaray bandhigga Carwadii siddeedaad ee Somaliland oo laga daah-furay magaalada Hargeysa.
Carwadan oo ay soo qaban qaabisay
Rugta Ganacsiga Somaliland ayaa sannadkiiba hal mar laqabta, isla markaana ay
kasoo qayb-galaan ganacsatada badeecadaha kala duwan dibadda ka keentay iyo
kuwa wershadaha wax soo saar dalka ku leh.
Guddoomiyaha rugta Ganacsiga
Somaliland, Maxamed Shugri, ayaa ugu
horrayn sharraxay muhiimadda ay carwadani u leedahay bulshada iyo sida ay
fursadda ugu tahay ganacsatada iyo macaamiishooda kala duwan, waxana uu
ganacsatada ku boorriyey inay madasha keenaan waxyaabo soo jiidan kara
macaamiisha, islamarkaana qiimahoodu macquul yahay.
Wasiirka Ganacsiga, wershadaha
iyo dalxiiska Somaliland, Mr: Maxamed
Xasan Sacad (Saajin), maayarka caasimadda Hargeysa, Mr: Cabdiraxmaan Maxamuud
Caydiid (Soltelco) iyo Badhasaabka gobolka Maroodi-jeex, Mr: Jaamac Xaaji Axmed
iyo xubno ku hadlayey ganacsatada waaweyn ee Somaliland oo madasha ka hadlay,
ayaa si isku mid ah u sharraxay faa’iidada ay guud ahaanba bulshada reer
Somaliland u leedahay furitaanka carwadani oo lagu soo bandhigayo wax soo
saarka kala duwan ee dalka gudihiisa ka soo baxa, adeegyada shirkadaha qaarkood
muwaadiniintooda u qabtaan iyo weliba waxyaabaha kala duwan ee ganacsatadu
dibadda kasoo waariddo.
“Horumarka dalka saddex qodob baa tiirar u ah,
mid waa dhaqaale, midna waa aqoon, midina waa hoggaamin. Haddii aynnu
saddexdaas tiir isla helno oo ay isla jaanqaadaan faqriga iyo baryadaba weynnu
ka baxaynaa.”ayuu yidhi madaxweyne Biixi oo ka hadlayey munaasibadda.
Waxaanu intaas ku daray “Fursadda
ay maanta Somaliland haysato labada sano ee soo socda, waa fursad haddii ay ina
seegto si loo heli doono aynnaan garanaynin, iyada oo aan la ina ictiraafsanayn
oo weliba qolo aynnu beri dawlad wada lahaan jirney inoo hanjabayso oo ay meel
walba inagala dagaallamayso, haddana Ilaahay wuxuu qaddaray maanta in caalamku
Somaliland usoo jeedo, cid kasta Bari iyo Galbeed wax Allah iyo wixii lacag
lahaa maanta way inoo soo jeedaan, haddaynaan ganacsatadeedan, aqoonyahankeenna
iyo dawladdeennu arrintaas ka faa’iidayn taariikhdu ina saamixi maysa’e ogaada
inteenna maanta xilka haysaay, annaguna xaggayaga diyaar baannu ka nahay.”
Barkhad-ladiif M. Cumar, Hiiraan Online
[email protected]
Hargeysa, Somaliland.
