Aqoon isweydaarsi ku saabsanaa sharciga Qaran ee badbaadada dhirta oo Muqdisho lagu qabtay
Isniin, December, 31, 2018
(HOL)- Aqoon-isweydaarsi la xiriiray wadatashiga ansixinta sharciga Qaran ee
badbaadada dhirta ayaa lagu qabtay Magaalada Muqdisho.
Waxaa Aqoon-isweydaarsigan
taabagelintiisa gacan ka geysatay heyadda Qaramada u Midoobay u qaabilsan
cuntadda iyo beeraha ee FAO, iyadoo uu fuliyay Machadka Soomaaliyeed ee
maareynta iyo u adkeysiga Aafooyinka – Somali Disaster Resilience Institute
(SDRI).
Masuuliyiin ka socotay
Wasaarada Beeraha iyo Waraabka Xukuumada Somalia iyo wakiilo ka kala socday
dowlad goboleedyada, aqoonyahano iyo iyo xubno kale ayaa ka qeyb galay aqoon
isweydaarsigan oo si weyn loo soo qabanqaabiyey.
Agaasimaha Machadka SDRI
Maxamed Cismaan ayaa ka waramay marxaladihii uu soo maray sharcigan, wuxuuna
xusay in Machadka uu qeyb weyn ka soo qaatay iskudubarida sharcigan, ayna
tababaro kala duwan siiyeen khubarada Wasaaradda beeraha.
Wasiir ku-xigeenka Wasaaradda
Beeraha Xukuumadda federaalka Somalia Xaamud Cali Xasan oo isna ka hadlay
Munaasabadan ayaa ka waramay muhiimada uu sharciga badbaadada dhirta u leeyahay
Qaranka iyo baahida loo qabo.
"Sharcigan in badan bay
ka soo shaqeysay Wasaarada beeraha oo kaashaneysa heyaddo kala duwan, wax
baddana waan sugaynay hadda wuxuu marayaa heer gebogebo ah, marka aynu
talooyinkeena ku biirino wuxuu u gudbi doonaa gacanta goleyaasha Xukuumada iyo
baarlamanka oo aan rajaynayo in sanadka cusub ee 2019ka gudihiisa ay
ansixiyaan" ayuu yiri Wasiirka oo u mahad celiyey heyadaha FAO iyo SDRI oo
gacan weyn ka geystay diyaarinta sharcigan.
Dr. Abdullahi Darmaan oo ah
Khabiir ku taqasusay sharuucda beeraha ayaa ka qeyb galayaasha
aqoon-isweydaarsiga u faahfaahiyey sharcigan iyo nuxurka uu xambaarsan yahay,
isagoo uga jawaabay su'aalo la weydiiyey, waxaana aqoonyahanada iyo ka
qeyb-galayaasha aqoon isweydaarsigan ay isku dhaafsadeen doodo iyo fikrado kala
duwan oo la xiriira sharcigan.
Xubnaha hadalada qiimaha leh
ka jeediyey aqoon-isweydaarsigan ayaa waxaa ka mid ahaa Wasiirkii hore
ee Beeraha Cabdi Axmed (Baafo) Xoghayaha joogtada ah ee Wasaarada beeraha
Maxamed Cali Ismaaciil, agaasimaha guud ee Wasaaradas Max'uud Maxamed Max'uud
iyo xubno kale.
C/raxmaan Diini, Hiiraan
Online
[email protected]
