Axad, December, 30, 2018 (HOL)-Wasiiirka caafimaadka Soomaaliya Fowziya Abiikar Nuur ayaa markii ugu horeysay ka hadashay dibad baxyo iyo gadood shaqo ay sameeyeen shaqaalaha isbitaalka Banaadir ee Muqdisho.
Guux ka dhashay
isbadallagu sameeyay Maamulka Isbitaalka Banaadir ayaa sababay banaanbax
cabasho ah in shaqaalaha ay dhigaan, iyagoo eedeen kulul u jeediyay wasaaradda
Caafimaadka.
Fowziya Abiikar ayaa warbaahinta
u marisay shaqaalaha iyo Maamulkooda in loo baahanyahay degaanaanta iyo
xasilooni si aysan hakad u galin howsha Isbitaalka uu hayo.
Waxeyna intaasi ku
dartay in aysan jirin shaqaale laga ceyrinayo isbitaalka balse ay isbedal ay ku
sameeyeen kaliya maamulka Isbitaalka Banaadir, howshuna ay halkeeda ka sii
soconeysa.
Wasiiirka caafimaadka Soomaaliya
Fowziya Abiikar carabka ku adkeysay in dibad bax iyo qeylo dhaan la sameeyo
aysan ka leexin doonin qorshaha wasaaradda caafimaadka ee ku aaddan la
wareegida isbitaalka Banaadir.
Mar ay dhigeen dibad
bax u muuqday mid abaabulan Shaqaalaha isbitaalka Banaadir ayeey ku eedeeyeen
wasaaradda caafimaadka musuq maasuq, waxeyna muujiyeen in aysan dooneyn maamul
cusub in loosoo magacaabo isbitaalka banaadir.
War qoraal ah oo goor
sii horeysay ka soo baxay Wasaaradda Caafimaadka Soomaaliya ayaa lagu sheegay
in Isbitaalka Hooyada iyo Dhalaanka ee Banaadir uu ka mid noqonayo xarumaha
Caafimaadka ee si tooska ah ay u maamuli doonto Dowladda.
