Madaxweynaha Somaliland iyo madaxweynaha dawlad deegaanka Soomaalida Itoobiya oo ku kulmay magaalada Wajaale
Jimco, December, 21, 2018 (HOL)- Madaxweynaha
Somaliland Muuse Biixi iyo madaxweynaha dawlad deegaanka Soomaalida Itoobiya
Mustafe Cagjar ayaa maanta ku kulmay magaalo xuduudeedka Tog-wajaale, gaar
ahaan dhinaca Somaliland.
Shirkan labada madaxweyne ayaa la sheegay inuu
ahaa mid lagaga hadlayey is dhexgalka bulshada, xoojinta amaanka,
ganacsiga, maalgashiga iyo sidii deegaanada ku teedsan xaduuda labada dal looga
hir gelin lahaa mashaariic horu marineed oo bulshada waxtar u leh. labadda
madaxweynaba waxa la socday ganacsato shirka kala qaybgashay, waxaanay taasi
daliil u tahay in xooga la saarayey arrimaha ganacsiga, maadaama oo Soomaalida
Itoobiya iyo Oromadduba ku xidhan yihiin magaalo ganacsiyeedka Wajaale.
Sidoo kale, kulankani markii uu dhamaaday waxay
labada madaxweyne u gudbeen Wajaale dhinaceeda Itoobiya, halkaasi oo dadweynuhu
ku soo dhoweeyeen.
Dhinaca kale, dawlad goboleedka Soomaalida
Itoobiya waxay raaligalin ka bixiyeen hadal dhowaan ka soo baxay oo Somaliland
ku eedeeyeen inay dadkii gabood falada ka sameeyey deegaanka ay ku dhuumanayaan
Somaliland, isla markaana falal amniga ka dhan ah ka wadaan, taas oo Somaliland
sheegtay in eedahaasi aanay waxba ka jirin oo wixii lagala soo baxday Jigjiga
dib loo celiyey.
Kulankan oo kale hore umay dhici jirin inuu
madaxweyne Somaliland ahi kulan gaar ah la yeesho madaxweyneyaashii soo maray
dawlad deegaanka Soomaalida Itoobiya.
Barkhad-ladiif
M. Cumar, Hiiraan Online
[email protected]
Hargeysa,
Somaliland.