Khamiis, December, 20, 2018
(HOL)- Hagaajinta amaanka duulista hawadda iyo xaalada
guud ee wadanka ayaa sababtay in shirkaddo caalami ah bilaabaan duulimaadyo toos
ah oo ay ku imanaya Garoonka diyaaradaha Aadan Cadde Airport ee magaalada
Muqdisho.
Said Eliye,oo ah Agaasimaha howlgalada iyo xiriirka caalamiga ah ee
Garoonka diyaaradaha Aadan Cadde ayaa sheegay in ay jiraan shirkaddo caalami ah
oo wada hadal ku jira si duulimaad toos ah uga bilaabaan Muqdisho.
‘’Waxeynu
xoogga saareynaa sidii aynu ku heli laheyn Madaar ama Garoon amaan ah iyo adeeg
wanaagsan iyo nabad-gayo, iyada oo la kaashanayo AMISOM Amniga ayaa wax badan
laga qabtay ayuu yiri’’ Said Eliye
Hadalka ayuu sheegay kaddib
markii ay diyaaradaha Kenya Airways bilaawday duulimaad toos ah oo
noqonaya Muqdisho iyo Nairobi.
Kenya Airways ayaa noqoneysa
diyaaradii saddexaad ee caalami ah oo dulimaad toos ah ka bilaawday Muqdisho,
iyadoo horay ay u jireen diyaaradaha Turkish Airlines iyo Ethiopian Airlines oo horeyba u bilaabay
duulimaadyadooda Muqdisho.
Eliye ayaa sheegay Qatar Airways iyo shirkado ganacsi oo ka socda Masar,
Imaaraadka Carabta, Sacuudi Carabiya iyo Uganda ay muujiyeen xiisaha ay u
qabaan duulimaadyada Soomaaliya.
C/raxmaan Diini, Hiiraan
Online
[email protected]