Talaado, December, 18, 2018
(HOL)- Madaxweyne Muuse Biixi ayaa maanta xafiiskiisa ku
qaabiley wefti uu hogaaminayo madaxa Guddiga caalamiga ah ee Laanqeyrta Cas
(ICRC) Mr. Simon Brooks.
Kulankan uu madaxweynuhu la qaatay weftiga, ayaa
lagaga wada hadlay sidii loo xoojin lahaa xidhiidhka wada-shaqayneed ee ka
dhexeeya Somaliland iyo Guddida caalamiga ah ee Laanqeyrta Cas (ICRC) looguna
diyaar garoobi lahaa qorshaha sannadka 2019-ka, oo ay ICRC xoogga ku saari
doonto adeegyada aas-aasiga ah iyo gurmadka deg-degaa, iyadoo la kaashanaysa Wasaaradda
Horumarinta Caafimaadka Somaliland.
Kulankan waxa madaxweynaha ku wehelinayey
Wasiirka Wasaaradda Horumarinta Caafimaadka, Dr. Xasan Ismaaciil Yuusuf, halka
dhinaca weftigana ay weheliyeen Madaxa laanqayrta cas, masuuliyiin ka socday
ICRC oo uu ka mid ahaa Wakiilka u qaabilsan Xafiiska ay Somaliland ku leedahay
Laanqayrta cas Mr. David McMullen.
Dhinaca kale, golaha Wasiiradda Somaliland waxay
meel mariyeen miisaaniyadii sanadka 2019 ka oo la sheegay inay ka badan tahay
miisaaniyadii sanadkii hore 8%.
Odoroska miisaaniyad-sannadeedka 2019-ka ee ay
maanta ansixiyeen xubnaha golaha wasiirrada Somaliland oo ah miisaaniyadii
27-aad ee qaranku yeesho, ayaa ka kooban miisaaniyadda guud ee dawladda dhexe,
hay’adaha madaxa bannaan, Dawladaha hoose iyo sanduuqa horumarinta Somaliland
ee SDF, iyadoo dhan, 2,334,320,463, 251 (Laba tiriliyan, saddex boqol Afar iyo
soddon Bilyan, saddex boqol iyo labaatan milyan, Afar boqol iyo saddex iyo
lixdan kun, laba boqol iyo kow iyo konton) Somaliland shilling. Miisaaniyad sannadeedka
2019-ku waxay diiradda saaraysaa, Amniga, Xoojinta iyo tayeynta garsoorka,
Waxbarashada, Biyaha, Caafimaadka, Xoolaha kalluunka, Beeraha, Tamarta iyo
Macdanta, Deegaanka, Aqoonsi-raadinta, Doorashooyinka, iyo daryeelka
shaqaalaha.
Barkhad-ladiif
M. Cumar, Hiiraan Online
[email protected]
Hargeysa, Somaliland