Talaado, December, 18, 2018 (HOL)- Madaxweynaha
dalka Jabuuti Ismaaciil Cumar Geelle ayaa sheegay in Isbadalka ka socda Geeska
Africa loo baahan yahay marka hore in si taxadir leh leysaga eego wixii dan
iyo dibin-daabyo ah ee ku jira.
Ismaaciil Cumar Geelle ayaa hadalka ka sheegay
xiritaankii madal ay isku arkeen Aqoonyahanno ka kala socda deegaannada looga
hadlo Afka Soomaaliya oo uu soo qaban qaabiyay Machadka HERITAGE.
‘’Isbadalka haatan socda iyo kuwa soo socdaaba waxaa
loo baahan yahay in la iska fiiriyo la iskana hubiyo wixii dan ah iyo dibindaabyo ee
ku jira, Waayo, Waan baahanahay Bahalo looma cuno.ayuu yiri Madaxweyne
Ismaaciil Cumar Geelle.
Kalmadan uu isticmaalay madaxweyne Ismaaciil
Cumar Geelle ayaa noqotay hadal heynta madasha, iyadoo aqoonyahannada qaarkood
sheegeen in madaxweynuhu ula jeeday in Soomaaliya looga baahan yahay in ay iska
eegto wixii dan ah ee ugu jira Isbadallada socda.
Madaxweynaha ayaa sheegay in marka laga hadlayo
danaha wadamada Geeska uu jiro Urur u xilsaaran oo ah Urur gobolleedka IGAD kaasoo
guta ayuu yiri xilka Iskaashiga Gobolka.
“Tusaale ahaan Dowladaha Jabuuti iyo Itoobiya
waxay qaadeen talaabooyin ku dayasho mudan, kuwaasoo ku saabsan dhanka
is-dhex-galka wadamada gobolka,”ayuu yiri hadalkiisa sii raaciyay madaxweyne Geelle.
Madasha waxaa dhinaca dowladda Soomaaliya uga
qeybgalay ra’iisal wasaare ku-xigeenka xukuumadda Mahdi Maxamed Guulleed
Khadar, Wasiiro iyo Xildhibaanno, sidoo kale waxaa ka qeybgalay aqoonyahanno,
dad magac-ku dhax leh bulshada iyo siyaasiyiin hore.
Agaasimaha Hay’adda HERITAGE Cabdirashiid Khaliif
Xaashi oo ay hay’addiisu soo agaasintay Shirkaasi ayaa sheegay in ay muhiimaddu
aheyd in Soomaalida la aruuriyo, isbedelkana lagu galo Indho furnaan iyo in loo
dad badsado, waxaa kaloo uu xusay in la isku afgartay in la bilaabo
wadahadaladii u dhaxeeyay Soomaaliya iyo Somaliland, iyadoo lala wadaagayo
Madaxda Qaranka.
Tan iyo wixii ka danbeeyay heshiiskii dowladdaha
Itoobiya iyo Eritrea gobolka Geeska Africa waxaa ka curatay dabeyl-siyaasadeed
oo laakiin siyaabo kala duwan loo fasiray, iyadoo dowladda Jabuuti u muuqato
wali mid aan ku dhax-milmin isku soo dhawaashiyaha dowladdaha, Itoobiya Eritrea iyo
Soomaaliya.
C/raxmaan Diini, Hiiraan
Online
[email protected]
