Talaado, December, 18, 2018
(HOL)- Magaalada Baydhabo waxaa ka soconaya diyaar-garoow ballaaran oo loogu
jiro qabanqaabada doorashada madaxweynaha maamulka Koonfur Galbeed Soomaaliya
oo dhaceysa 19ka bishan oo ku beegan maalinta berri ah.
Waxaa maanta kulan wada tashi ah iyo is xog-wareysi ku yeelanaya magaalada
Baydhabo guddiga doorashada madaxweynaha maamulka Koonfur Galbeed, iyadoo
amaankana siweyn loo adkeeyay.
Waxaa la soo gabagabeeyay hadal jeedintii ama
khudbadihii musharaxiinta u taagan xilka
madaxweynaha.
Guddiga doorashada iyo Maamulka Koofur Galbeed
ayaa ku adkeysanaya in doorashada ay ku dhici doonto waqtigeeda, waxaana jiray
dalab iyo baaqyo ka imaanaya xildhibaanada labada gole ee baarlamaanka iyo
guddoomiyaha oo dalbanayay in la joojiyo doorashada.
Ammaanka hoolka ay ka dhaceyso doorashada
madaxweynaha ayaa waxaa la wareegay ciidamada Booliska, sidoo kale howlaga
sugida amniga guud ee magaalada Baydhabo si wadajir ah uga qeyb qaadanaya ciidamada
milateriga, Booliska, Nabadsugida iyo ciidanka Itoobiya.
Doorashada ayaa la filayaa in ay dhacdo xili uu
wali xiran yahay Mukhtaar Rooboow oo ka mid ahaa musharixiinta madaxweynaha ee
maamulka Koonfur Galbeed ee sida weyn loo hadal hayay, waxaana 13kii bishan
magaalada Baydhabo ka soo xiray ciidamo Itoobiyaan ah oo u soo gacan galiyay
dowladda Soomaaliya.
C/raxmaan Diini, Hiiraan
Online
[email protected]
