Jimco, December, 14, 2018 (HOL)- Ardayda
maqalka naafadda ka ah ee dhagooleyaasha ayaa mudaharaad ka dhigay
magaalada Boorama, waxaanay diidanayeen maamulka dugsigoodoo oo ay sheegeen in
aanu aqoon farta dhagooleyaasha.
Ardaydan ayaa boodhadh ay ku xardhan yihiin
cabashadoodda ku soo bandhigay, waxaanay sheegeen in la takooreyo oo maamulka
la keenay dugsigoodda aanu ahayn mid ay is fahmayaan.
Ardaydan isku soo baxa sameeyey ayaa dalbaday in
dugsigoodda la ixtiraamo oo dawladdu aanay takoorin, waxaanay codsadeen in
maamule fahmi kara loo keenno.
Waxa kale oo ay sheegeen in cabashadooda ula
tageen wasaarada waxbarashada balse aan waxba looga qaban, waxaanay boodhadhka
far waaweyn ku qoreen (Fadlan ha na takoorina )., waxaanay si weyn uga
cadhoodeen in dacwadooda oo xafiisyo kala duwan gaadhsiiyey aan cidiba uga
jawaabin.
Dhinaca kale, qaar ka mid ah wariyeyaasha ka
hawlgalla magaalada Boorama ayaa xabsiga loo taxaabay ka dib markii ay duubeen
banaanbaxan ay ardayda dhagooleyaashu sameeyeen.
Barkhad-ladiif
M. Cumar, Hiiraan Online
[email protected]
Hargeysa,
Somaliland.