Isniin, December, 10, 2018 (HOL)-Xildhibaan Khaliif Cabdi Cumar oo ka mid ah mudanayaasha baarlamaanka Soomaaliya ayaa sheegay in guddoomiyaha Baarlamaanka Soomaaliya Maxamed Mursal Sheekh Cabdiraxmaan xabsi guri ku yahay madaxtooyada Soomaaliya.
Xildhibaanka oo hadal ka jeedinayay munaasabad lagu soo dhaweeynayay hoggaamiyaha xisbigga Wadajir Cabdiraxmaan Cabdi Shakuur Warsame, waxaa uu sheegay in loo diiday iyaga oo ah xildhibanno dhowr ah in ay u tagaan guddoomiyaha Golaha Shacabka.
Xildhibaanka ma sheegin cidda ka dhigtay xabsi guriga iyo sababaha looga dhigay,mana jiro war kasoo baxay Gudoomiye Mursal oo arintaan xaqiijinaya.
Guddoomiye Mursal ayaa degan guriga Martida Madaxtooyada halkaa oo uu degenaa tan iyo markii loo doortay xilka Guddoomiyaha Baarlamaanka, hase ahaatee waxaa uu Xafiiskiisa ahaa Villa Hargeysa oo ku dhegan Madaxtooyada.
Maalintii shalay ayeey aheyd markii uu guddoomiyuhu qabtay mooshin ka dhan ah madaxweynaha dowladda Soomaaliya oo ay soo gudbiyeen xildhibaanno ka tirsan Golaha Shacabka.
Magaalada Muqdisho ayaa waxaa maanta gilgilay dibadbaxyo looga soo horjeedo mooshinka ka dhanka ah madaxweyne Farmaajo, waxaana ay dibadbaxayaashu socod ku mareen qeybaha kala duwan ee magaalada iyaga oo ku qeylinaya erayo ay ku taageerayaan madaxweynaha.
C/raxmaan Diini, Hiiraan
Online
[email protected]
