Sabti, December, 01, 2018 (HOL) –
Dowladda Soomaaliya ayaa sheegtay in iyada oo kaashaneysa saaxiibadeeda
caalamiga ah howlgal ay ka fuliyeen deegaanno ka tirsan gobolka Baay ku dileen
Sagaal xubnood oo ka tirsan Ururka Al-shabaab.
Wasaarradda Warfaafinta Dhaqanka
iyo Dalxiiska dowladda Soomaaliya ayaa war ay soo saartay ku sheegtay in
howlgalka uu dhacay 30kii bishii November maalintii shalay.
Weerarkan oo ahaa sida ay
Wasaarraddu sheegtay mid qorsheysan lagu bartillmaameedsaday saldhigyo
Al-shabaab ay ku lahaayeen deegaannada la weeraray, islamarkaana lagu dilay
Sagaal xubnood oo ka tirsanaa Al-shabaab.
Wasaarradda ayaa intaa ku dartay in dowladda
Soomaaliya ay sii wadi doonto howlgallada ka dhanka Al-Shabaab ee gobolka Bay, waxaana
ay intaasi kusii dartay in howlgalkaan uu daba socday howlgallada maalmihii
lasoo dhaafay ka socday gobolka Mudug.
Maalmihii ugu danbeeyayba waxaa sii xoogeysanayay
weerarrada cirka iyo dhulka ah ee lagu bartilmaameedsanayo fariisimaha
Al-shabaab ee gobollada Koonfurta iyo Bartamaha dalka Soomaaliya
C/raxmaan Diini, Hiiraan
Online
[email protected]
