Isniin, August, 06, 2018 (HOL) – Wasaaradda arrimaha gudaha
Puntland ayaa ku baaqday inan la dhibaateyn dadka qaxootiga ku ah deegaannada
dowlad-gobolleedka, kaddib markii baraha bulshada lugu baahiyay muuqaalka nin
la sheegay inuu ka soo jeedda qowmiyada Oramada oo lugu jirdilay magaalada
Boosaaso.
Sarkaal ka tirsan wasaaradda oo la hadlay warbaahinta
gudaha, ayaa sheegay inay meel adag ka taagan-tahay siyaasadda Puntland
dhibaato in loo geysto dadka maganta u ah, wuxuuna inta ku daray in la
bunbuuniyay dhacdada ka dhacday magaalada Boosaaso.
" Puntland ma ogalaneynso in la dhibaateeyo dadka
qaxootiga ah." ayuu yiri Burhaan Huurse Xaashi oo ka tirsan wasaaradda
arrimaha gudaha " Ma jirto wax dhibaato ah oo la soo garsiiyay wasaaradda,
balse waxaa jirta dhacdo la buunbuuniyay oo ah nin Oromo ah oo lugu
bugabugeeyay Boosaaso." ayuu raaciyay hadalkiisa.
Xaashi , ayaa sheegay in la qaadayo tallaabooyin looga
hortagayo in la dhibaateeyo dadka ka soo jeedda qowmiyada Oromada ee qaxootiga
ku ah Puntland, wuxuuna yiri " Puntland horey ayay u sheegtay marna ma
aqbaleyno xiisada ka taagan Itoobiya in ay saameyn ku yeelato dadka halkan nala
jooga."
Iman Mohamed Jama, Hiiraan Online