Khamiis, August, 23, 2018 (HOL)– Kooxda
kubadda koleyga ee la magac baxday SYDOM oo ka dhisan Minnesota ayaa
wacdarro la yaab leh ka dhigtay tartamadii ciyaaraha saaxiibtinimo oo ay
ku cayaarayeen dalalka Europe sida: Ingiriiska, Sweden iyo Finland.
Kooxdan oo ka socotay
ururka horumarinta HORUMARINTA DHALLINYARADA SOOMAALIYEED EE GOBOLKA
MINNESOTA oo marka magacooda la soo gaabiyo loo yaqaan”SYDOM” ayaa iyagu
cayaaray 9 ciyaarood, waxaana laga adkaaday hal ciyaar oo kaliya.
Dhallinyaradan iyaga ah oo da’doodu ay u dhaxeysay 17 ilaa 23 air ayaa
muujiyay qaab ciyaareed ay aad ugu riyaaqeen dadkii faraha badnaa oo u soo
daawasho tagi jiray maalin kasta.
Mar aan la xiriiray tababaraha
xulka qaranka Soomaaliyeed ee K/Koleyga Cabdulqaadir Xaaji Daahir “Shiikha” oo
isagu hor kacayay wafdigaasi ciyaartooyda, ayaa ii sheegay in dhallinyarada ay
muujiyeen Akhlaaq iyo ciyaar wanaagsan oo aad loogu ammaanay, iyaga oo mararka
qaarkood la ciyaarayay kooxo D’a ahaan iyo jir ahaan ka waaweynaa.
Ujeedada safarkeenuna waxaa uu ahaa inaan u
kuur galno oo aan raadino cayaartooyda Soomaaliyeed ee ku nool Europe oo ka
qayb qaadan kara cayaaraha qaranka Soomaaliyeed iyo in dhallinyaradu is
bartaan oo isdhex galaan waayo aragnimona kala kororsadaan iyo in
dhallinyaradu arkaan nolosha dadka Soomaaliyeed ee ku nool Europe.. Runtiina
wax aad u weyn ayey ka soo kororsadeen isdhexgalka halkaasi ka billowday oo aan
rajaynayo inuu noqdo mid aan joogtayno.
Waxan jeclahay inaan halkan ugu
mahadceliyo tababarayaashii kooxda gacanta ku hayay oo kala ahaa: Sadik Haji
iyo Khalid Hussein oo muujiyay dadaal dheeri ah iyo dhallinyaradii
ka qayb qaadatay tartanka oo guusha soo hoysay kuwaasi oo kala ahaa:
Dahir Haji,Faruk Ahmed, Mahad Haji, Ahmed Mohamoud, Jama Bulhan,Sakaria
Haji, Adnan Guled, Mustafa Ali, Ali Ali, Mohamud Ahmed , Mohamed
Khalif iyo Mohamed Yusuf .
Ugu dambeyntii Tababare Shiikha,
waxaa uu mahadcelin ballaaran u soo jeediyay Dadkii suuro galiyay in cayaarahan
ay ka qabsoomaan magaalooyinka London, Stockholm iyo Helsink iyo
jaaliyadaha Soomaaliyeed ee ku dhaqan saddexdaasi magaalo oo dhallinyarada u
muujiyay kalgacal dheeri ah iyo Soomaalinimo.
