Shirkii dowladda Federaalka iyo Puntland uga socday Garoowe oo la soo gabagabeeyay
Khamiis, August, 02, 2018 (HOL ) - Shir
gaar ah oo magaalada Garoowe uga socday golaha wasiirrada dowladda Federaalka
iyo dowlad-gobolleedka Puntland ayaa goor dhow la soo gabagabeeyay.
Kulanka waxaa shir guddoomiyay
ra'iisul wasaaraha Soomaaliya, Xasan Cali Khayre, waxaana dhinac fadhiyay oo
shirka ka qeybgalay madaxweynaha Puntland, Cabdiweli Maxamed Cali Gaas iyo
ku-xigeenkiisa ,Cabdixakiim Xaaji Cumar (Cameey).
Afhayeenka madaxtooyada Puntland,Cabdullaahi
Maxamed Jaamac (Quraan Jecel) ayaa marka uu soo dhammaaday kulanka dowladda
Federaalka iyo Puntland, wuxuu faahfaahiyay qodobbada looga hadlay, wuxuu
sheegay shirka in diirrada lugu saaray wada-shaqeynta dowladda federaalka iyo
Puntland, waxaa inta dheer oo shirka lugu soo qaaday xoojinka dowlad-nimada
Soomaaliya iyo nidaamka federaalka.
" Waxaa muhiim u ah Puntland oo
shirka lugu soo qaaday dowladda Federaalka mashruuca ay waddo oo ah sidii
Soomaaliya looga dhaafi lahaa deynta ballaaran ee lugu leeyahay, si ay u
suuragasho inay Soomaaliya oo dhan qaadato mashaaric horumarineed... shirka
waxaa kalo la isku afgartay in la sameeyo guddiyo farsamo oo ka shaqeeya
qodobbada ay isla-garteen DF iyo Puntland." ayuu yiri afhayeenka Puntland.
Shirkan waxaa kalo lugu go'aamiyay
in si dhaqso ah loo sii daayo maxabiis ku jirta xabsiga dhexe magaaladda
Garoowe, kuwaasi oo ku dhow 600 boqol muwaadin oo loo haysto falal burcad
badeednimo ah, si ay ugu dhamaystaan xukuno ay ku rideen maxkamadu
ku yaalla dalka dibadiisa, iyaddoo loo marayo hab sharci ah, daba-galka
arrintaanna ayaa waxaa loo xil saaray ra’iisul wasaare ku-xigeenka iyo wasiirka
Cadaaladda Soomaaliya.
Docda kale, waxaa hadda bilowday
shirka golaha wasiirrada dowladda Federaalka Soomaaliya oo ka mid ah kulamdii
khamiislaha ahaa ee wasiiradu ay yeeshaan isbuuc walba, kaas oo markii ugu
horreeysay lugu qabannayo magaalada Garoowe.
Iman Mohamed Jama, Hiiraan Online