Axad, August, 19, 2018 (HOL)-
Abaanduulihii ciidamada xoogga dalka Soomaaliyeed Jen Cabdullaahi Cali Caanood
oo uu dhawaan madaxweyne Farmaajo xilkii ka qaaday ayaa waxba kama jiraan ku
tilmaamay warar soo baxay oo sheegaya in uu la goostay gadiid dagaal iyo
ciidan.
Wuxuu sheegay in hadda isaga iyo
ciidamo ka tirsan xoogga dalka Soomaaliyeed howlgal ka wadaan qeybo ka mid ah
gobolka Shabeelllaha dhexe, gaar ahaan wuxuu intaa ku daray in dagaal uu ku
dhaxmaray ciidamada uu hogaaminayo iyo
Al-shabaab degmada Marka ee xarunta u ah gobolka Shabeellaha Hoose.
Mar wax laga weydiiyay wax ka
jira in uu ka carooday xil ka qaadistii uu dhawaan ku sameeyay madaxweyne
Farmaajo ayuu yiri ‘’ "waxaasi waxba kama jiraan, waa wixii Soomaali ku
hoogtay oo ku ba'day, ilaahna naguma jirrabo", hadalkaas oo uu ula jeeday
inuusan diyaar u ahayn dagaal jabhadayn ah.
Jen Caanood ayaa intaa ku daray
in uu xilka ku wareejin doonto taliyaha cusub marka uu soo dhamaado howlgalka
uu hadda u joogo gobolka Shabeellaha hoose.
Warka ku saabsan in Abaanduuluhu
la goostay gadiid dagaal iyo ciidamo ayaa soo baxay kadib markii laga war-helay
in isago ku dhawaad 40 gadiidka dagaalka ah oo Al-shabaab ay jidgooyo u
dhigteen deegaan aan wax badan ka fogeyn degmada Shalanbood ee gobolka
Shabeellaha dhexe.
C/raxmaan Diini, Hiiraan Online
[email protected]
