Saddex ruux oo ku dhaawacmay rasaas lagu furay gaari ay la socdeen – degmada Ceel-Waaq
Sabti, August, 18, 2018 (HOL) –
Saddex ruux ayaa ku dhaawacmay rasaas lagu furay Jimcihii shalay gaari ay la
socdeen oo marayay inta u dhaxeysa deegaannada Ceel-Waaq iyo War-guduud sida uu
warbaahinta u sheegay qof ka tirsan dadkii dhaawacu soo gaaray.
Dhibanaha oo diiday in
magaciisa la adeegsado ayaa sheegay in markii gaariga rasaasta lagu furayay uu
ku sii jeeday degmada Mandheera, waxaana
uu intaa ku daray mar kaliya ay ka war heleen rasaas ku socta gaarigii ay sar-naayeen.
‘’Waxaan soo baxnay Ceel-Waaq
markii aan ku soo dhawaannay deegaanka Warguduud waxaa ka war helnay rasaas
nagu socta, dhamaanteen dhulka ayaa wada
seexanay muddo ayeey-na rasaastu soctay’’ ayuu yiri dhibanaha la hadlay
warbaahinta.
Saddex ruux oo dhaawacoodu
halis yahay ayaa hadda lagu daweynayaa isbitaal ku yaala degmada Mandheera,
waxaana ay dhakhaatiirtu sheegeen inkastoo uu jiray dhiig bax aad u daran hadda
xaaladoodu tahay mid degan.
Lama oga sababta loo weeraray
gaariga ay la socdeen dadkan rayidka ah, hasse ahaatee saraakiisha amniga ayaa
sheegay in ay baarayaan,
C/raxmaan Diini, Hiiraan
Online
[email protected]
