Talaado, August, 14, 2018 (HOL)– Ciidamada dowladda Soomaaliya iyo kuwa howlgalka midowga Africa AMISOM ayaa maanta weerar ku qaaday fariisimo Al-shabaab ay ku lahaayeen deegaanka Basra oo ah marin isku xira labada Shabeelle.
Goobjogayaal ayaa sheegay in ciidamad is baheysanaya maanta
dhowr jiho ka weerareen saldhigyo Al-shabaab ay halkaa ku lahaayeen, halka
weerarka qaar-na ay sheegayaan in ay jirtay duqeyn cirka iyo diyaarado weerarka
ka qeyb-qaatay.
Ilaa iyo hadda dhab ahaan looma oga khasaaraha rasmiga ah ee
ka dhashay weerarka, hasse ahaatee saraakiisha ciidamada dowladda ayaa sheegay
in weerarkaasi lagu guuleystay lagana gaaray dantii laga lahaa howlgalka.
Kooxda al-Shabab ayaa bilahii ugu dambeyay
weeraro ka soo abaabulayay deegaanka Basra iyagoo waddada isku xirta Balcad iyo
magaalada Jowhar ka dhigay maritaankeeda mid aad u halis badan marka ay
timaaddo masuuliyiinta maamulka Hir-Shabeelle iyo ciidamada dowladda
federaalka.
Dhawaan waxaa booqday gobolka Shabeellaha dhexe
taliyaha ugu sareya ciidamada AMISOM isaga oo ku booriyay ciidamada in ay la
howlgalaan kuwa xoogga dalka Soomaaliyeed wada jirna looga qeyb-qaato dagaalka
ka dhanka ah Al-shabaab.
C/raxmaan Diini,
Hiiraan Online
[email protected]