Saraakiil iyo odayaal dhaqameed ku shiray magaalada Jigjiga ee dowlad deegaanka Soomaalida Itoobiya
Sabti, August, 11, 2018 (HOL) - Magaalada
Jigjiga ee dowlad deegaanka Soomaalida Itoobiya waxaa maanta uu shir ku
dhaxmaray saraakiil ka tirsan dowladda dhexe ee federaalka Itoobiya oo ka soo
duulay magaalada Addis Ababa iyo odayaasha dhaqanka deegaanka.
Gaar ahaan kulanka waxaa dhinaca
Itoobiya ku matalaya saraakiisha kala ah Jeneraal Xasan Ibraahim oo wasaaradda
difaaca ee Itoobiya u qaabilsan sirdoonka, iyo taliyaha milateriga ee bariga
Itoobiya Jeneraal Balaay Sayuu oo dhinac ah, iyo Odayaasha dhaqanka.
Kulanka ayaa intiisa badan
diirrada lagu saaray arrimo u badan amniga iyo waliba rabashadihii ugu
danbeeyay ee ka dhacayay todobaadyadii aynu soo dhaafay qeybo ka mid dhulka
dowlad deegaanka Soomaalida Itoobiya.
Saraakiisha ayaa sheegay in
sababta ciidamada federaalka Itoobiya u soo fara-galiyeen xaalada gobolka tahay
sidii loo joojin lahaa rabshadaha looga-na hortagi lahaa amaan darro soo food
saarta dadka shacabka iyaga oo intaa ku daray in mar-naba aan la aqbali doonin
cid hub qaadata oo dibeda uga baxda magaalada uga baxda.
Dhinaca odayaasha dhaqanka waxaa
ay saraakiisha raali-galin ka siiyeen rabshadihii dhacay iyo gubistii goob mac-bad
ah oo ay Kiinasado ka mid ahaayeen, sidoo kale waxaa ay raali-galin ka bixiyeen
boob iyo dhac loo geystay dadka aan Soomalida aheyn gaar ahaan dadka ka soo
jeeda Qowmiyada Oromada.
Marka laga soo tago odayaasha
dhaqanka iyo saraakiisha sidoo kale kulanka waxaa fadhiyay oo ka qeyb-galay
madaxweyne ku-xigeenka cusub ee dowlad deegaanka Soomaalida Itoobiya Xamdi Adan
Cabdi oo hadda ah ku-simaha madaxweynaha.
Kulankan ayaa imanaya dhinaca kale iyadoo uu
kulan ka socdo magaalada oo ay shir ku leeyihiin dawladda federaalka Itoobiya
iyo xubno ka tirsan xisbiga dimoqaraadiga shacabka Soomaalida Itoobiya.
C/raxmaan Diini, Hiiraan
Online
[email protected]