Maxkamada Jubbaland oo waqti kale u qabatay dhageysiga dacwada Askari dilay Xaaskiisa
Khamiis, April, 26, 2018 (HOL )- Maxkamadda Ciidamada Qalabka Sida ee Maamulka Jubbaland ayaa la horgeeyay dacwad ka dhan ah C/laahi Asad Ismaaciil oo ku eedeysan in uu magaalada Kismaayo ku dilay 14-kii bishan April xaaskiisa oo lagu magacaabi jiray Muxubo Maxamed Guure.
Dilkan ayaa ka dhacay xaafada Calanley ee
magaalada Ksismaayo, xili habeen ah saacadu marka ay aheyd 08:00 fiidnimo,
sida ay sheegtay Maxkamadda.
Guddoomiyaha maxkamadda darajada Koowaad ee
ciidamada qalabka sida Jubbaland Bashiir Max’uud Xareed ayaa sheegay kiiskan
maxkamadda la horkeenay in dib loo baari doono, wuxuuna tilmaamay in dib la
isugu soo laaban doono 15-ka bisha May 2018, maadaama cadeymo ku filan la
waayay.
“Maxkamadda maanta waxaa ay u fariisataya dhageysiga
koowaad kiis Dil ah oo lagu soo eedeeyay C/laahi Asad Ismaaciil oo 28 sano jir
ka tirsan Taliska ciidamada Jubbaland, markii aan dhageysanay Dacwada waxaa inoo
cadaaday inaan la keenin cadeymo ku filan kiiskan, waxay xeer ilaaliyaha
Maxkamadda fareysaa in uu keeno cadeyn ku filan kiiskan, dib ayaana la isugu soo
laaban doonaa” ayuu yiri Gudoomiye Bashiir.
C/laahi Asad Ismaaciil ayaa Muxubo Maxamed
Guure guursaday 15-kii bishii Janaayo 2018-ka, waxaana dhacdadan maalmihii
dambe aad loogu hadal hayay baraha bulshada.
Falkan uu ku eedeysan yahay askarigan ayaa noqday
mid aad la yaab iyo amkaag ugu riday bulshada Soomaaliyeed, kaddib markii la
sheegay in xili habeen ah xaaskiisa oo jiifta uu si ula kac ah u dilay.
C/raxmaan Diini, Hiiraan Online
[email protected]
