Khamiis, April, 26, 2018 (HOL )- Dowladda
Federaalka Soomaaliya ayaa waxaa ay sheegtay in ay cadeyneyso heshiiska
saxaafadda laga sheegay ee lala galay shirkadda SKA inuusan aheyn mid waafaqsan
habraaca dowliga ah ee ay dejisay wasaaradda Maaliyadda Xukuumadda Federaalka
Soomaaliya.
Wasiirka Maaliyada xukuumadda Soomaaliya C/raxmaan Ducaalle Bayle ayaa waxa uu sheegay heshiisyada
nuucaan oo kale ah ee lala galo shirkado gaar loo leeyahay in ay yihiin kuwo
waxba kama jiraan ah.
War-saxaafadeed ka soo baxay dowladda ayaa waxaa
lagu sheegay in Xukuumadda ay bilowday baaritaan looga gol leeyahay in laga sal
gaaro sida uu ku yimid iyo Habraaca loo maray heshiiskaas la sheegay in lala
galay shirkadda SKA.
Shirka Golaha Wasiirada Soomaaliya ee ugu soo
horeeya ayaa waxaa la horkeeni doonaa natijada baaritaanka heshiiska iyo talo
bixinta ku aadan talaabooyinka la qaadayo.
War-saxaafadeedka dowladda ay soo saartay kuma
aysan sheegin nuuca heshiiska, cida shirkadda SKA ay heshiiska la gashay, marka
laga reebo in dowladdu ay sheegtay shirkado gaar ah in lala galay.
C/raxmaan Diini, Hiiraan Online
[email protected]
