Taliyaha ciidamada xoogga dalka Soomaaliyeed oo booqday dugsiga tababarka Jen Gordan
Sabti, April, 21, 2018 (HOL) - Taliyaha ciidamada
xoogga dalka Soomaaliyeed Gen.Cabdiweli Jaamac Gorod ayaa galinkii danbe ee
maanta booqday dugsiga tababarka Gen.Gordan oo ay dhowaan ka baxeen Imaaraadka.
Taliyaha ayaa khudbad u jeediyay ciidamada ay
Imaaraadku gacanta ku hayeen, isaga oo sheegay in ay ka mid yihiin ciidamada xoogga dalka isla markaasna uu
waajibaad ka saaran yahay difaaca dalka, dadka iyo diinta.
Jen Gorod ayaa sheegay iney muhiim tahay in
markasta ciidanku aaminaan iney u dagalamayaan difaaca karaamada iyo
qarannimadda waddankooda.
Ciidanka ayaa dhankooda balan qaaday iney ilaalin
doonaan nidaamka ciidan ee waddanka u yaal waxa kale oo ay sheegeen iney mar
kasta ku weyn tahay waddanimada iyo difaaca dalka.
Markii uu soo dhamaaday kulanka taliyaha iyo ciidamada waxaa uu kormeer ku tagay Jen Gorod dhammaan xerada wuxuu
soo arkay gaadiidka xerada yaala, sidoo kale taliyaha ayaa dhexgalay isbitaalka
ku yaala xerada.
Xerada Gen Gordan ayaa waxaa hore u maamulayay
Dowlada Isutagga Imaaraadka Carabta waxaana ay joojisay kaalmadii iyo gacan ku
hayntii ay hore ugu haysay xeradan kadib markii uu xumaaday xiriirka ay la
leedahay dowlada Soomaaliya.
Xiriirka labada dal ayaa xumaaday kaddib markii
ay dowlada Soomaaliya la wareegtay lacag ku dhow Toban malyan oo dollar taasoo
ay keentay diyaarad laga leeyahay Imaaraadka Carabta magaalada Muqdisho.
C/raxmaan Diini,
Hiiraan Online
[email protected]