Jimco, April, 20, 2018 (HOL) - Arsene Wenger ayaa ku
dhawaaqay in dhamaadka xilli ciyaareedka in uu ka tagi doono shaqada
Tababarenimo ee Kooxda Arsenal muddo 22 sano oo uu soo ley-liyay.
Wenger ayaa noqonaya tababaraha
ugu waqtiga dheer ee xilligan Horyaalka Premier League, iyadoo sanadkii 1996 uu
si rasmi ah u qabtay shaqada tababarnimo ee Kooxda.
Warkan arintan ku saabsan ayaa lagu shaaciyay Barta
Twitter-ka ee Arsenal , oo lagu sheegay
in markan Arsene Wenger macsalaameynayo
kooxdiisa dhamaadka xili cayaareedkan.
Tababaran oo u dhashay dalka Faransiiska ayaa kooxda u qaaday Sagaal koob,
oo 3 ka mid ah uu yahay Horyaalka Premier League iyo 7 Koobka loo yaqaano
FA-ga.
Xilli Ciyaareedkan iyo kii ka horeeyay Arsenal waxaa uu ahaa
xilligii ugu xumaa abid, iyadoo ay guul-darooyin iyo dib u dhacyo soo wajaheen,
waxaana ay haatan kaalinta 6aad kaga jiraan kala sareynta Horyaalka.
Wenger waxaa siweyn labadii sano ee ugu danbeeyay ugu
kacsanaa taageerayaasha kooxda, iyadoo cadaadis ku saarayay inuu iska casilo
shaqada, waxaana ay xilliyada qaar garoomada u soo qaadanayeen Boorar ay ku
qoran tahay halku dhigyo kala duwan.
C/raxmaan Diini,
Hiiraan Online
[email protected]
