Imaaraadka “ heshiiska dekedda Berbera waxaan la galnay dowladdii hore ee Soomaaliya
Arbaco, April, 18 , 2018 (HOL) - Wasiiru dowlaha Arrimaha Dibadda Imaaraadka
Carabta Anwar Maxamed Qarqaash ayaa ka hadlay xiisada siyaasadeed ee kala
dhaxeeya Soomaaliya, isagoo soo hadal qaaday in heshiiskii Dekeda Berbera uu ku
yimid is faham dhex maray dowladdii hore ee Soomaaliya.
Wasiiru-dowlaha arrimaha dibeda Anwar Qarqaash la
hadlay BBC-da laanteeda afka Carabiga ayaa sheegay inay aqoonsan yihiin
Midnimada Soomaaliya, isagoo caddeeyay in aanay wax xiriir ah la laheyn
Somaliland, isla markaana Qunsuliyad iyo Safaarad midna ku laheyn.
“Arrinta Dekeda Berbera waxay ku dhacday is faham
cad oo aan la yeelaneynay dowladiii hore ee Soomaaliya, is fahamadaas waxay
ahaayeen kuwo cad cad, waxay hoos imaanayeen taageerada Soomaaliya oo mid ah,
innaga qunsuliyad kuma lihin Somaliland, safaaradana kuma lihin, xiriirna lama
lihin, iskaba daayee waxaa kaalin fududeyn ka qaadanay inaan kulamo u qabano
madaxda Soomaalida, waxay ku kulmeen Dubai iyo Abu Dubai, haddii aan
aqoonsanahay siyaasadda Soomaali mid ah, in aysan naga reebeyn inaan ka
shaqeyno dhinacyada horumarinta, gargaarka iyo kaalmada in aan Somaliland ka
sameyno”ayuu yiri Anwar Qarqash.
Mar uu ka hadlayay wada hadalada lagu xalinayo
khilaafka diblomaasiyadeed ayuu sheegay in Soomaaliya looga baahan yahay wada
hadal furan oo aan qol xiran aheyn.
“Haddii qof ku kalameynayay 20 illaa 25 sano ay
wax idin dhex maraan waa in aad kala hadashaa, ma ahan inaad qabsato diyaarad
ay saaran yihiin 47 askari Imaaraad ah oo ciidamada tababaraya oo ku dhowaad 10
milyan dollar ciidan wixii ku baxayay siday oo aad go’aan kaas qaadato oo aad
arrinta dhahdo, waxaa ku xalineynaa qol xiran, maya sidaas howsha kuma
dhamaaneyso waa in arrintaas cadaataa”ayuu yiri Anwar Qarqash.
Wasaaradda Arrimaha Dibadda Soomaaliya ayaa shaaca ka qaaday inuu socdo wada
hadalo lagu xalinayo mad madowga labada dal soo kala dhex galay iyo arrintii
dhacday 8-dii bishan ee lagu xayiray diyaarad ka diwaangashaneyd Imaaraadka
Carabta, isla markaana Ciidamada Amniga Soomaaliya la wareegeen lacag gaareysay
9.6 milyan.
Xiriirka diblomaasiyadeed ee Soomaaliya iyo
Imaaraadka Carabta ayaa sii xumaanayay, waxaana Imaaraadka ay ku dhawaaqeen
inay joojiyeen howshii tababarada ay ka wadeen Soomaaliya, iyagoo si KMG ah u
joojiyay shaqadii Isbitaal ay ku lahaayeen magaalada Muqdisho, kaasoo maalin
walba bukaan socotada siinayay daawo.
C/raxmaan Diini,
Hiiraan Online
[email protected]