Sabti, April, 14, 2018 (HOL) –Wararkii ugu
danbeeyay ee ka imanaya magaalada Boosaaso ee gobolka Bari ayaa sheegaya in la
fasaxay diyaaradii laga lahaa Isku-tagga Imaaraadka Carabta, madaama lagu
xayiray garoonka.
Wararka ayaa waxaa ay sheegayaan in diyaaradan ay
ka qaaday magaalada Boosaaso macalimiin tababaraysay ciidamada Badda ee
maamulka Punland kadib markii uu xumaaday xiriirka u dhexeeya wadamada
Soomaaliya iyo Imaaraadka Carabta.
Khilaaf soo kala dhaxgalay saraakiishii la soctay
diyaarada iyo Ilaalada garoonka ayaa sababtay in saacado diyaarada lagu xayiro
halkaa.
Wararka ayaa waxa ay sheegayaan in tababarayaasha
ay ugu dambeyntii oggolaadeen in la baaro boorsooyinka ay wateen ayna reebaan
hub ay siteen.
Sidoo kale waxaa wararka ay sheegayaan in loo
diiday markab sitey calanka Imaaraadka Carabta in uu hub ka qaado dekeda,
waxaana socda wada hadalo arrintan lagu xalinayo.
Arrintan ayaa muujineysa heerka uu gaarsiisan
yahay khilaafka u dhaxeeya dowladda
Soomaaliya iyo Imaaraadka Carabta, kaddib markii sidan oo kale todobaadkii hore
dowladda Soomaaliya ku qabtay garoonka Aadan Cadde diyaarad laga lahaa
Imaaraadka oo sida malaayiin dollar.
C/raxmaan Diini,
Hiiraan Online
[email protected]
