Talaado, September, 12, 2017 (HOL) – Afar ruux oo u dhalatay dalka Burundi
ayaa lagu qabtay Subaxnimadii hore ee Talaadadii maanta magaalada Marsabit oo ka tirsan Isiolo dalka Kenya, waxaana la
sheegay in raggan la qabtay damacsanaayeen in ay ku biiraan xarrakada
Al-shabaab.
Saraakiisha booliiska ayaa sheegay in raggan ay ka soo tageen magaalada
Bujumbura ee dalka Kenya iyagoo iska dhigaya dalxiisayaal, iyaga oo doonayay
marka danbe in ay ka sii gudbaan xadka magaalada Mandera una tallaabaan dhinaca
Soomaaliya.
Afarta ruux ee la qabtay ayaa magacyadooda lagu kala sheegay
Ntakarutimana Benerd, 41 jir ah, Niyongere Yusuf oo 32 jir ah,
Nshimirimana Fulgnce Shadady 31 sano jir ah iyo Bizoza Abderauf oo isaguna 20
sano jir ah.
Saraakiisha Booliiska dalka Kenya ayaa sidan oo kale bishii June waxa ay ku
qabteen shan dhalinyaro u dhalatay dalka Kenya waxaa lagu xirey isla deegaankan
iyagoo doonaya inay ku biiraan ururka Alshabaab.
Al-shabaab ayaa la sheegay in ay ka tirsan yihiin tiro badan oo Ajaanib ah kuwaa oo intooda badan ka soo jeeda qaarada Africa.
C/raxmaan Diini, Hiiraan Online
[email protected]
