Arbaco, October, 18, 2017 (HOL) – Madaxweynaha dowladda Soomaaliya Maxamed
Cabdullaahi Farmaajo oo wareysi gaar ah siiyay Telefishinka Al Jazeera
qeybtiisa Afka English-ka ayaa Al-shabaab ku eedeeyay in ay ka danbeeyeen
Qaraxii Zoobe ee galaaftay nolasha dadka badan oo Soomaali ah.
Al-shabaab ma aysan sheegan Qaraxan laakiin madaxweyne Farmaajo ayaa sheegay
in faraha Al-shabaab ay ka muuqdaan Weerarkii Ismiidaaminta ahaa ee 14kii
bishan ka dhacay Isgoyska ugu mashquulka badan caasimada Muqdisho.
“Kani waa farahoodii waxa ka muuqada Qaraxan, waana wax ay sameyn
jireen”ayuu yiri Madaxweyne Farmaajo oo ka codsaday beesha Caalamka in gacan
lagu siiyo dagaalka ka dhanka ah Al-Shabaab.
Madaxweynaha ayaa sheegay haddii ay Al-shabaab ku guuleystaan dagaalka hadda
socda ay fikirkooda qaldan sida uu hadalka u dhigay u gudbin karaan Yurub iyo America
Al-shabaab ayaa ka gaabsaday in ay ka hadlaan gabi ahaanba Qaraxa waxaana uu
madaxweyne Farmaajo yiri’’ “Waxaan u maleynayay in ay sheegan doonaan, laakiin
waxay og yihiin in ay mas’uuliyad aad u weyn ay noqon laheyd”.
Qaraxan ayaa waxaa siweyn u cambaareeyay guud ahaanba caalamka, waxaana lagu
tirinayaan in uu yahay Weerarkii ugu xumaan ee ka dhaca Soomaaliya inta
taariikhda la xasuusto.
C/raxmaan Diini, Hiiraan Online
[email protected]
