Ciidamada AMISOM oo ka guuraya mid ka mid ah saldhigyadoodii ugu weynaa Muqdisho
Talaado, July, 11, 2017 (HOL) - Ciidamada AMISOM ayaa bilaabay in ay ka guuraan mid ka mid ah fariisimihii ugu weynaa ee ay ku
lahaayeen magaalada Muqdisho, gaar ahaan dhismaha Jaamacaddii Gaheyr ee ku taal
degmada Wadajir.
Dhismaha Jaamacaddan ayaa muddo 10 sano ku dhow ay degenaayeen Ciidamada
AMISOM ee ka socda dalka Burundi, waxaana lagu wadaa in lagu wareejiyo Ciidamo
isugu jira Boolis iyo Nabad-Sugid.
Ciidamadan isaga baxaya Jaamacada ayaa lagu wadaa wadaa in
la geeyo magaalada Jowhar ee xarunta maamulka Hirshabeelle, si ay ugu biiraan
ciidamada halkaas ku sugan ee ka socda dalka Burundi.
Dowladda federaalka ayaa wada qorshe ay ku dooneyso in AMISOM looga saaro
meelaha muhiimka ah ee bulshada, waxaana dhowaan lagu wadaa in laga saaro
Garoonka Kubadda cagta ee Stadium Muqdisho oo muddo ay degan yihiin.
Jaamacadda Gaheyr waxaa ay ka mid tahay Jaamacadda umadda , waxaana
dhawaan lagu wadaa in dib u dayactir lagu sameeyo, si loogu bilaabo waxbarashada.
C/raxmaan Diini, Hiiraan Online
[email protected]
