Hargeysa:Dhacdadii loogu hadal haynta badnaa oo noqotay hooyo Ilma yar wadato oo shalay diyaarad laga soo reebay
Sabti, August, 26, 2017 (HOL)-illaa shalay waxa baraha
bulshaddu ku wada xidhiidho lagu hadal hayey dhacdo bani’aadanimadda ku xun oo Shirkadda
Fly Dubai ku samaysay haweenay ilmo yar wadato oo diyaaraddii ay raacaysay laga soo dajiyey iyo wasiirka Hawlaha guud Cali
Mareexaan oo rakaabka diyaaradda ka mid ahaa oo la dareen noqday haweenaydaasi
oo isna ka soo haray diyaaraddii si uu mooralka haweynaydaasi u dhiso.
Dhacdadana ayaa waxay ka dhacday madaarka Hargeysa wakhti
loo balansanaa in la raaco diyaaradda Carabta laga leeyahay ee Fly Dubai oo
markii diyaaraddi buuxsantay ay isku dhaceen haweenaydaasi iyo
shaqaalaha diyaaradda ka dibna kabtankii diyaaraddu go’aansaday in uuhaweynaydaasi
safarka ka reebo, haseyeeshee wasiirka hawlaha guud Cali Mareexaan ayaa isku
dayey inuu dhex dhexaadiyo, markii qoladii diyaaraddu ku adkaysteen arrintaasi
wuxuu isna go’aansaday in uugabadha la reebayo ka mid noqdo oo uu ka hadho
safarkaasi diyaaradda.
Dhacdadan ayaa noqotay mid dood ku dhex abuurtay dadweynaha dhexdoodda,
iyadoo badankoodu taageeray wasiirka Hawlaha guud iyo go’aanka geesnimadda leh
ee uu qaatay, waxaanay dhacdadani u dhacday sidan waxaana barta Internetka ee uu wasiirku leeyahay
Facebooga ku soo qoray sheekadii siday u dhacday “Gabadhani waa Somalilander waxay
sidataa ilmo yar waxay u socotay UK waxay airport Hargaysa timi 4.30 am si ay
uraacdo Flydubai, anigu waxaan airport imi 6.40am si aan u raaco Flydubai.
Hasse ahaatee gabadhi
iyo ilmaheediiba waxaa diyaaradi lagaga soo rogay khasab.
Diyaaraada waxaa la fuulay 7.40am gabadha iyo ilmeheedi waxay
fadhisteen kursigii loogu talo galay hase ahayee islaan waayeel ah oo aan kici
karayn ayey isu bedeleen kursigii. Wax yar ka dib inan cadaan ah oo shaqaalaha diyaada ka mid ah ayaa u timi gabadhii waxay u sheegtay in ay
kursigedii ku fadhiisato waxay ku tiri ka daaqada ma fadhisan karo waayo ilmo
yar ayaan haystaa waxaa laga yaaba in aan kackaco oo aan musqusha u baahdo.
Gabadhi shaqaalaha ahayd way ku adkaysatay, ninkale oo
rakaabkii diyaarada ah ayaa yidhi kayga ha fadiisato. Gabadhii shaqaalaha diyarada
ahayd way cadhootay waxay u tagtay captain_ kii diyaarada waxay go'aan ku gaadheen in gabadha iyo ilmaha yarba diyaada laga dejiyo. Waxaa
diyaradii soo fuulay shaqaale Soomali ah oo u shaqaynayey Flydubai waxay gabadhi
u sheegeen in ay ka degto diyaarada
waxay tidhi maxaan sameeyey waxaa lagu yidhi waxaad cayday inan shaqaalaha
diyaarada ka mid ah waxay tidhi cidna maan caayin Laakin lama dhegaysan.
In yar ka dib ayaan soo dhexgalay inamadii Somaliga ahaa
waxay ii sheegeen in aan wax wayni jirin laakin captainku amar bixiyey waxaanay
iga codsadeen bal in aan kabtanka ladlo. Kabtankii ayaan ugu tegey qolka
diyaarrada laga wado waan isu sheegay wuu soo yara kacay wuu isasoo taagay
waxan ka codsaday in aan gabadha iyo ilmaha yar la dejin wuxu iiisheegay in ay
go'aan ku gaadheen in aanay racin gabadhaasi diyaaradii waxay habsaantay saacad
iyo toban daqiiqo.
Markii uu aniga iyo managerka airprortka naga diiday waxaa
telefon kula soo hadlay wasiirka duulista hase yeeshee insa waa la diiday, markaa waxaan anigu go'aan ku gaadhay in aniguna aan ka dego diyaarada.
Inkasta oo ay isku dayeen in ay igu qanciyaan in aan raaco diyaarada hadana
waxaan soo raacay gabadhii ilmaha yar sidatay.Sidaas ayaa aniga iyo gabadhiiba
aanu kaga hadhnay diyaaradii.
Waxaa ila soo hadlay markiiba
regional diractorka Flydubai wuxuu iisoo garaacay in uu raali galiyo laakin waxaan u sheegay inuu
raaligelin siiyo miskiintaa la dulmay shaqaaloodana waxay sameeyeen ay ahayd
masuuliyad daro. waxaanu iminka raacaynaa Daalo ama Juba.
Hadaad arki jirteen Airhostess jajaban oo rakaabka soo
dhaweeya oo dhoola cadaynaya oo caruurta iyo waayeelka caawinaya iminka waxa
soo baxay kuwa laad kaga soo rogaya diyaarada.”
Arrintani waxay tilmaamaysa in wasiirku markii uu wax ka
qaban kari waayey gabadha la dajiyo,isla markaana wasiirkii shaqadan lahaaa la diiday
uu isagu awoodi karayo inuu mooralka hooyadda ilmaha yar wadata ilaaliyo.
Dhinaca kale, wasiirka duulista hawaddad sare Farxaan Aadan
Haybe ayaa sheegay in haweenaydaasi uu isagu amray in laga soo dajiyo ka dib markii
khilaaf soo kala dhexgalay iyada iyo shaqaalihii diyaaradda.
"Aniga qaaday go'aanka ah qofkaa ha la soo reebo, ma garanayo wasiirka waxa
soo raaciyay ma qaraaba ma..? wasiirka telefoonkan ka wada hadalnay ana waan ka
soo hadhaya buu yidhi warbaahintana waan u yeedhanaya oo waan la hadlaya dee
haddaad la hadasho ceebi may dhicin baan ku idhi ee nidaamkayagii saxda ahaa
baanu marnaye taasi waa arrin kale laakiin, masuuliyadda madaarku
wasaaraddayday hoos timaadda go'aanka aanu qaadanayna go'aan sax ah buu
ahaa," ayuu yiri wasiirka Duulista oo u jawaabay wasiirka Hawlaha guud.
Barkhad-ladiif M. Cumar, Hiiraan Online
[email protected]
Hargeysa, Somaliland.