Maxkamada sare oo digniin u dirtay hay’addaha garsoorka iyo laamaha amniga dowladda
Isniin, Augusto, 21,
2017 (HOL) – Guddoomiyaha maxkamada sare ee dalka Ibraahim Iidle Suleyman, ayaa
fariin u diray hay’addaha garsoorka iyo laamaha amniga dowladda federaalka,
isaga oo sheegay in aan la aqbali doonin dadka iska xir xiran ee aan sharciga
la horkeenin.
Waxaa uu sheegay guddoomiyaha in marnaba aan raali laga noqon
doonin muwaadiniin Soomaaliyeed sharci daro xabsiyada ugu jiraan, isaga oo
intaa ku daray in deg deg loo sii daayo cid kasta oo aan loo heysan wax danbi
ah laakiin hadda ku xiran xabsiyada dalka.
‘’Waan la xisaabtameynaa taliyayaasha saldhigyada ay dadkan ku xiran yihiin, haddii lagu helo in
dadkaasi aysan wax danbi ah laheyn’’ ayuu yiri gudoomiyaha maxkamada sare.
Bishii aynu soo dhaafnay madaxweynaha dowladda Soomaaliya
Maxamed Cabdullaahi Farmaajo ayaa guddi gaar ah oo madaxbanaan u saaray la
socodka xaalada maxaabiista ku jirta xabsiyada, kuwaa oo sii daayay dhalinyaro
Soomaaliyeed oo qaarkood mudo ka badan shan sano u xirnaa lacago aad u yar oo
ay adkeyd in mudo intaa la eg qof uu u xirnaado.
C/raxmaan Diini, Hiiraan Online
[email protected]
