Sabti, September, 02, 2017 (HOL) – Madaxweynaha dalka Kenya Uhuru Kenyatta
oo dadweyne isku soo baxay kula hadlaya Suuqa Burma ee magaalada Nairobi,
ayaa ku tilmaamay guddoomiyaha maxkamada
sare ee Kenya iyo garsoorayaasha ‘’Burcad’’ kaddib go’aankii ka dhanka ahaa
natiijadii doorashadii Augusto ee maalintii shalay maxkamadu soo saartay.
Waxaa gabi ahaanba la baabi'iyay natiijadii ka soo baxday doorashadii Augusto oo guddiga doorashadu sheeciyeen in uu ku soo baxay Uhuru Kenyatta, kaddib markii maxkamada sare ay waxba kama jiraan ka soo
qaaday natiijada doorashada, waxaana ay amartay in muddo labo bilood ah lagu qabto
doorasho cusub oo ay ku tartmi doonaan Uhuru Kenyatta iyo musharaxa ay sida
weyn isku hayaan ee Raila Odinga.
Uhuru Kenyatta ayaa maalintii shalay shir jaraa’id ka sheegay in uusan ku
raacsaneyn maxkamada go’aanka ay gaartay, laakiin uu ixtiraamayo isaga oo
shacabka ugu baaqay in la muujiyo walaalnimo iyo nabad.
Maxkamada sare ee Kenya ayaa tallaabada ay qaaday lagu tilmaamay mid
taariikh ah oo ku cusub qaarada oo idil, waxaana ay dad badan arintan ku ku
tilmaameen in ay muujineyso sida ay maxkamada sare Kenya uga madax-banaan
tahay fara-galin islamarkaana xor ugu tahay qaadashada go’aamadeeda.
C/raxmaan Diini,
Hiiraan Online
[email protected]
