Talaado, September, 19,
2017 (HOL)– Nin lagu magacaabo Sheekh
Cabdiwali Sheekh Cali Calimi Yare oo lagu eedeeyay in Sawir uu baahiyay uu ku
sheegay in uu yahay Nabi Maxamed SCW ayaa beeniyay eedeynta loo soo jeediyay.
Waxaa uu sheegay isaga
oo la hadlay BBC in marnaba Sawirka qof kale uusan ku sheegin Nabi Maxamed SCW, laakiin waxaa uu tilmaamay in Sawirka uu soo
bandhigay yahay Macalinkiisa oo lagu magacaabo Maxamed kuna nool sida uu
hadalka u dhigay magaalada Nairobi ee dalka Kenya.
‘’Sawirka aan soo
bandhigay waxaa uu ahaa Macalinkeyga oo aan jeclahay oo lagu magacaabo Maxamed,
waa uu nool yahay Nairobi ayuu joogaa, adigga ayaan kaa maqlayaa in Nabi Maxamed SCW la
suuradeyn karo ama la sawiro karo’’ ayuu yiri Sheekh Cabdiwali.
Qoraal ay saxiixeen qaar ka mid ah Hay'adda culimada Soomaaliyeed ayaa lagu sheegay in "Sheekh Cabdiweli uu yahay nin diinta ka
baxay, nabinimadiina siiyeey qof aan Nabi Maxamed ahayn."
Maxkamada magaalada Gaalkcayo oo maanta dhageysatay
doodda ninkan eedeysanaha ah ayaa sheegtay in wax danbi ah lagu waayay lana
fasaxay.
Garsooraha maxkamaddaas, Sheekh Maxamed Macallim Cali
ayaa BBC-da u sheega in ninka la eedeeyay oo lagu magacaabo Sheekh Cabdiweli
Sheekh Cali Cilmi Yare uu maxkamadda hor yimid oo su'aalo la waydiiyay, markii
dambana la fasaxay.
Arintan ayaa buuq badan ka dhax dhalisay bulshada
Soomaaliyeed oo siweyn la yaabtay markii ay arkeen sawirka lagu sheegay in uu
yahay Nabi Maxamed SCW oo Ninkani uu baahiyay.
C/raxmaan Diini, Hiiraan Online
[email protected]
