Wasaarada amniga oo daah furtay kulan ku saabsan wada shaqeynta ciidamada booliiska Soomaaliyeed Sawirro
Talaado, September, 19,
2017 (HOL)– Wasiirka wasaarada amniga gudaha Maxamed Abuukar Ducaale Islaaw
ayaa maanta daah furay shir ku saabsan
wada shaqeynta iyo tayeeyn lahaa ciidamada booliiska Soomaaliyeed.
Shirkan oo ah mid wada
tashi ah ayaa waxaa ka qeybgalay wasiirka wasaarada amniga, taliyaha ciidamada
booliiska Soomaaliyeed, taliyayaasha ciidamada booliiska maamul gobolleedyada,
maamulka gobolka Banaadir iyo saraakiisha ciidamada AMISOM.
Wasiirka ayaa sheegay in
shirkan uu daba joogo heshiis ay horay u gaareen maamul gobolleedyada dalka iyo
dowladda dhexe iyo go’aannadii shirkii London ka dhacay bishii May ee sanadkan.
‘’Sida aad la soctaan
waxaa jiray heshiis u dhaxeeyay maamul gobolleedyada dalka iyo dowladda dhexe
oo la xiriiray dhismaha ciidamo Qaran oo tayo leh, waxaa lagu heshiiyay in la
dhiso 18 Kun oo ciidamo militari ah iyo 32 Kun oo ciidamo booliis Soomaaliyeed
ah sidaa daraadeed shirkan waa mid wada tashi ah oo arintaan xiriir la leh ayuu
yiri’’ wasiirka.
Wasiirka ayaa sheegay in
ujeedada shirka laga leeyahay tahay sidii loo ogaan lahaa xogta ciidamada booliiska
maamul gobolleedyada dalka, waxa ka dhiman iyo baahiyaha ay qabaan, waxaana uu intaa ku daray in wixii macluumaad ah ee arintan ku saabsan loo gudbin doono
taliyaha ciidamada booliiska Soomaaliyeed.
Shirkan oo socon doona
muddo Saddex maalmood ah ayaa la filayaa uu soo xirmo maalinta Sabtida ee
todobaadka danbe.
C/raxmaan Diini, Hiiraan Online
[email protected]
