Maamulka Koonfur galbeed oo taageeray Isbaheysiga Sacuudiga iyo Imaaraadka Carabta
Isniin, September, 18, 2017 (HOL) - Maamulka Koonfur galbeed ee fadhigiisu
yahay magaalada Baydhabo ee xarunta gobolka Baay ayaa qoraal uu soo saaray ku
taageeray isbaheysiga Sacuudi Carabiya iyo Imaaraadka, iyagoo sheegay in
go’aankii dowladda Federaalka ka qaadatay xiisada khaliijka in aan laga
tixgelin, islamarkaana lagala tashan.
War saxaafadeed ku qornaa Luuqada English oo ka soo baxay xafiiska
Madaxweynaha Koofur Galbeed Shariif Xasan Sheekh Aadan ayaa lagu sheegay in
maamulka Koofur Galbeed uu garab taagan yahay isbaheysiga Sacuudiga iyo
Imaaraadka Carabta.
War saxaafadeedka ayaa lagu sheegay in Imaaraadka iyo Sacuudiga uu ka
dhaxeeyo Soomaaliya xiriir iskaashi oo taariikh leh, sidoo kale waxaa lagu
sheegay war saxaafadeedka in Imaaraadka uu Soomaaliya ka taageerayo dhinacyada
bani’aadanimada, caafimaadka iyo gargaarka deg dega, dadka ku nool dhamaan
gobolada dalka oo dhan.
Warsaxaafadeedkan waxaa warbaahinta gudaha u xaqiijiyay Ugaas Xasan Cabdi
Axmed, isaga oo sheegay in maamulka Koonfur galbeed taageersan yahay dowladda
Khaliijka ee xiriirka u jaray Qatar.
Akhriso Warka ka soo baxay maamulka Koonfur galbeed :
C/raxmaan Diini, Hiiraan Online
[email protected]